海洋公園「賺錢」？係呀，拎咗政府9億，就賺1億。
［海洋公園「賺錢」？笑死me］本人大膽講句，除咗海洋公園內部班友，我應該係全世界最齊數最熟書嘅人之一。海洋公園由2000年至2023年嘅數，我儲起晒入起晒。由陳南祿到盛智文孔令成劉鳴煒龐建貽，一個不漏一掃光。你最好睇過晒呢23年嘅數，先好去質疑我，先去發表你嘅高見
作者Facebook Page：金融肉骨茶 https://www.facebook.com/meatbonetea/__0">
Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，月費100港紙有找． 畀年費仲有85折
1. 今篇唔講咁遠，只講近期。遠古嘢下篇再講。介紹返，海洋公園6月尾年結。
TLDR：獨立思考嘅嘢，個個照抄新聞稿，話海洋公園轉型成功，轉虧為盈。不如畀少少常識諗下：孔令成年代600萬人入場，都要輸錢，都要R納稅人科水。而家得210萬入入場，會有錢賺？ — 有嘅，你輸8億但拎政府9億津貼，「咪有1億盈利」。唔好笑，是真的！唔止，盤數核數師「無法表示意見」添呀
TLDR：全盛時期，海洋公園爭政府60億。而家只係爭政府20億。你估下點解？但亦即係，根本海洋公園執笠，納稅人都唔會有乜大損失。及早斬纜，好過年年掉錢落個無底深潭。
2. 之前寫過幾次海洋公園，2019年尾2020年初。正係佢地連蝕幾年，要去R政府錢。當時仲係孔令成，甚至未到劉公子（已起身）。之後又社運又疫情，大家都知。
3. 好啦，而家「復常」，大家都去咗幾次日本，海洋公園就出咗2023年業績（即係2022年7月至2023年6月）。話轉虧為盈喎，你信？
4. 睇唔少傳媒嘅報導，寫乜？「海洋公園全年扭虧賺1.18億 持續轉型通關帶動 入場人次多五成」 — 我唔使ChatGPT都知係新聞稿。「扭虧」就應該事實（定唔係？再討論）。但「持續轉型通關帶動」，一睇就知新聞稿，管理層飛機嘢，爭在未講自己領導英明。
5. 作為一個有常識嘅人，你應該諗下，成件事make 唔make sense？梗係有古惑啦。人數由封關嘅極低基數，升返五成，就轉虧為盈？係咁把炮嘅，管理層仲唔大鑼大鼓？
6. 講白啲，孔令成年代都輸錢，而家會贏錢？合唔合你嘅常識？真係轉型成功？你睇啲人幾易呃。但埃汾嘅讀者比別人知得多。
7. 再講白啲，過去一年210萬人次。孔令成年代600萬人入場，都要輸錢。咁你覺得，而家有乜可能賺錢？真係節流有道？咪玩啦！
8. 真正原因：好簡單 — 拎咗政府9億！咪賺錢囉！唔計？咪蝕到趴街，一年蝕8億。幫你圈住咗啦
＝＝＝＝
9. 盛智文年代，人人話好。可能佢形象好，可能個社會未咁noisy，可能佢好彩timing好 — 但佢年代海洋公園年年賺錢，事實。一年近800萬人入場，又係事實。當然時也命也，而家搵佢出山都冇用，佢亦冇咁低能搞臭自己個名。
10. 盛智文當年好似半畀人迫走，但真係焉知非福，行運到腳趾尾。其實佢後期已經見到入場人次跌緊。之後2015年，疑似梁粉孔令成接手，開頭仲有老本食，但後期入場人數一年少過一年，去到社運前幾年得返600萬人，開始蝕錢，開始要問政府大手攞錢救。亦係嗰時我開始寫文討伐。
11. 劉公子接手年代，啲數難睇到極。但我講真的，劉公子家山有福 — 佢撞著社運，然後疫情。對香港同唔少人嚟講係慘事，但就呢件事上，對佢嚟講，真係千載難逢嘅好恩賜。社運加疫情下，蝕到趴街好合理，邊個做都蝕，根本冇人可以怪佢。你話係咪行運？
12. 到之後復常，開關，劉公子亦剛好拍拍籮柚走。新上任嘅龐建貽（我估冇乜人知佢接咗手），就冇呢種luxury，冇得賴疫情了
＝＝＝＝＝＝
13. 請睇，過去一年係210萬人入場。孔令成年代畀人小到九彩，都仲有600萬人。孔令成年代都要輸錢，咁你話而家點會唔輸到趴街？
14. 所謂「轉虧為盈」，哈哈哈 — 你收咗8.5億政府補貼嘛，梗係盈啦！扣返，咪輸7億。多過孔令成年代任何一年！
15. 甚至未計中間有7000萬係嚟自「減值回撥」 — 之前一年，大手減值咗18億。呢啲kitchen sinking take a big bath 一件污兩件穢三件冇所謂，就間間公司都咁玩，一定所有嘢爆晒出嚟，之後輕身上路，唔會擠牙膏。
16. 問題係，今次呢7000萬回撥，核數師直頭「無法表示意見」（Disclaimer of opinion）你可以問下會計專家，即係乜意思。
17. 但我喱文地話你知，即係「海洋公園班友咁講咋，我地唔同意的」。官方講法：如果核數師認為無法取得充足證據去做核數，及有失實陳述可能會造成重大影響，就發表「無法表示意見」(Disclaimer of opinion)。
18. 你唔計呢7000萬唔知合唔合理嘅回撥的話，「核心虧損」，差不多8億。
19. Last thing，最好笑係仲有3000萬「投資收入」 — 買乜？定期存款！梗係啦，12億（期末就16億）現水做定期！錢從何來？當然係政府，即係納稅人嘅錢。定應該慶幸只至少冇買港股？應該搵你啲年年都贏三四成嘅網友專家入去做，做乜唔一早all in Nvidia呀？
20. 拿，拎晒啲錢去做定期，咁就轉型成功啦。
＝＝＝＝＝＝
21. 最後，引返啲傳媒入面講嘅「業界意見」。可能就係海洋公園入面嘅人！或者自己友，或者仇家。小心
22. 有業界認為公園控制經營成本有道，「慳到錢」所以「有錢剩」 — 我刁啦！證明乜？證明啲業界係弱智的。點「慳到錢」所以「有錢剩」？擺明就係因為笠咗政府8.5億。證明啲業界真係文盲。我留名等啲網友出嚟質疑「你run過水族館咩？你做過主題公園咩？點解我要聽個未run過嘅人講嘢」 — 係呀，我冇做過主題公園，但我識字的。而啲「業界」係唔撚識字的。不服來辯
23. 另一個就有趣啲，應該係仇家，或者入面嘅鬼打鬼 — 有業界批評公園「玩財技」，有錢賺只是「假象」；又指園方近年沒有進取吸客招數，擔心政府資助一旦耗盡，公園長遠難以維生。
24. 頭半我十分同意，大家都知。至於「擔心政府資助一旦耗盡，公園長遠難以維生」 — 唔使擔心，因為一定難以維生。
25. 同你睇埋數，雖然呢幾年海洋公園拎咗納稅人60億（係！），但而家淨資產只係得返10億左右。你話錢去咗邊？而一年佢地蝕緊8億 — 換言之，應該下年就又要伸手攞錢。
26. You heard it first from Ivan，唔好到時先後知後覺聽啲垃圾KOL話核爆級。我疫情前已經話你知。
27. 冇錯，你可以話呢期業績，都仲未開晒關，可能之後會好啲。但海洋公園之前嘅遊客，唔少正係因為香港人冇得去日本先同個寶貝仔去！
28. 仲有，真係hate to say，但之前好多人自作聰明咁講「只係靠大陸人去，太短視」 — 但實情係「冇大陸人去就更早執笠」。況且，而家就連大陸人都唔去。
29. 再講一次，孔令成年代600萬人入場都仲要年年輸幾億，你覺得嚟緊幾年海洋公園會賺到錢？想賭幾多隻企鵝？
＝＝＝＝＝＝＝
30. 之前講「拆咗海洋公園拎去起樓」，好多人都話太radical，太民粹，唔似我。「我都未講拆咗佢起公屋」，大家支持我做特首。
31. 但認真啲講，呢幾年納稅人已經注咗超過60億，我相信好快會去到100億（當年正係海洋公園嗰時海獅開大口講要100億，我就寫文鬧）。
32. 拿，聽聞個個話財赤，港紙就爆煲，政府好莫財。咁仲使呢啲錢？成100億喎！
33. 有啲友仔話「小朋友有地方去唔好咩」，仲鬧我因為冇仔女先咁講。拿，100億，不如就分咗佢，我就唔會貪呢啲錢。有小朋友嘅先有得分，滿意未？我粗略計過，每個家長至少分到成皮嘢 — 爽未？畀你自己去日本啦，去乜撚海洋公園？係咪咁話？
34. 講埋樣most beautiful嘅嘢畀你知：海洋公園清盤都好，根本政府都冇乜損失。點解？因為好多都係已出之物。全盛時期海洋公園爭政府（即係爭大家）60億。而家？只係爭20億唔到。你估點解？生財有道？咪玩啦。咪就係政府補貼，已經當粉筆字咁抹晒佢，唔使還。
35. 咁而家歐士釘定嘅窿，只係得20億。你可以計埋賠畀啲高層呀，安置啲企鵝呀，醒多20億。40億應該點都埋到單，好過無底深漂。何況，刁，嗰20億歐士釘定窿，根本就唔會有得還架啦。
36. 個仔年年輸錢，輸完返嚟問你填，你就掃佢出門口就最好，以前爭落嘅都唔使佢還。佢唔再返嚟R你再畀錢，你咪已經賺咗。
37. 亦都證明咩「自負盈虧」，真係得啖笑。自負盈虧，不過輸咗錢有得填，咁是那門子的自負盈虧呢？
38. 公平講句，我並唔係任何情況都反對政府「拯救」某啲東西。甚至係私營企業也無不可，根本啲人飛機嘅鬼佬國家都係咁做 — 例如救飛機。
39. 我十分認真地講，之前政府一樣救國泰，一樣借錢注資 — 但政府全身而退，仲有息收，仲幫庫房進帳。真係近年政府少有嘅Good Deal，詳情之前Patreon寫過。但重點係乜？首先國泰本身係有盈利能力嘅公司，疫前後，疫後都係，只係中間要幫一幫，海洋公園正好相反，疫情輸錢，疫後都係。第二，政府救國泰嘅deal，設計得好好多，絶對唔係好似海洋公園咁blanket guarantee，伸手就拎
40. 呢啲，就搵啲有財經常識嘅人啦。
Ivan金融Patreon ，比別人知得多。subscribe now ，可以睇返晒以前嘅文。金融嘢，港美市場評點，月費100港紙有找． 畀年費仲有85折
41. 呢篇只係序幕，只係講最新一年。之後我會寫，同你計清海洋公園過去23年嘅胡塗帳，stay tuned。記住支持Patreon，因為呢啲公眾利益文我費事放收費，但都係嗰啲讀者養住我的。
