奧本海默：解碼圖靈，莫扎特傳定楊修之死？其實書名話咗你知：阿美利堅普羅米修斯。武夫學者，都係畀冷氣房嘅文人用完即棄嘅
［奧本海默］結果唔算寫得好長。不過篇文都拆開四部份，易啲睇。首先我會講少少套戲嘅感想，然後就會探討套戲嘅主題到底係乜，之後會講奧本海默其人其事，最後探討返套戲嘅核心：成也才華敗也才華
TLDR：解碼圖靈，莫扎特傳定楊修之死？其實書名話咗你知：阿美利堅普羅米修斯。武夫學者，都係畀冷氣房嘅文人用完即棄嘅。普羅米修斯盜天火，結果受懲罰。奧本海默整原子彈，情況亦差不多（當然，仲因為佢周圍食女，仲好鍾意搞人老婆）。仲有留意，人類拎到火，江湖從此多事。美國拎咗原子彈，世界又不一樣了。
有關套戲 — 唔係好路蘭，因為改編本書
1. 呢套嘢，照計唔怕劇透。甚至有人話一定要劇透，最好做足準備先入場，睇咗啲背景先。
2. 但我覺得又有啲多餘，因為根本做唔到。入面涉及太多嘢。你要個普通觀眾，去睇核裂變，量子力學，又Bohr又海森堡（哥特爾Gödel都出埋呀！同愛恩斯坦散步嗰個），又哥根廷又Leiden，又麥卡錫主義又西班牙內戰。又冷戰軍備賽，核不擴散，聯合國。甚至涉及戰爭倫理嘅爭議，轟炸長崎有冇必要等等。你搵個狀元都識唔晒啦。
3. 戲嘛，一句，拍得好好的。但相當之唔「路蘭」。明顯地係因為佢受制於本書。另外，以前我覺得佢拍啲靜態文戲唔係好掂（睇TENET就知），呢套就幾好了，
4. 呢個劇本極之有野心，亦都有啲難拍，可以拍到好悶。好老土講，三粒鐘話咁快就過，係有必要拍咁長，甚至我覺得應該再長啲。但一大堆嘢，路蘭舖排得清楚，有條理 — 但又唔會當你白痴，唔會用好多VO或者字幕交代背景，更加唔會直接話你知啲人嘅性格，而係用對白刻劃。
5. 難得在，佢又唔會為咗你易明，特登將啲嘢庸俗化（例如A Beautiful Mind，甚至The Big Short之類），搞到不倫不類 — 呢樣嘢冇出現。
＝＝＝＝＝＝＝＝＝＝＝＝＝＝＝＝
套戲其實講乜？主題係乜？ — Triumph And Tragedy
6. 呢套並唔係一套拍二戰嘅戲，甚至唔係好係一套講科學家嘅戲（早兩年有套講居禮夫人），亦唔完全係一套講偉人一生嘅戲。其實主題係乜？睇返本書名就經明：阿美利堅普羅米修斯。
7. 不得不讚，書名非常好。普羅米修斯係盜天火畀世人，江湖從此多事。佢自己受懲罰，但亦開始咗人類「返唔到去」嘅墮落（亦即係同伊甸園禁果類似）（留意我中國就有倉頡造字後，天雨粟鬼夜哭，道理類似）
8. 戲入面講到明，奧本海默就好似普羅米修斯咁，將原子彈畀咗美國。然後美國就掌握咗權力，重塑咗世界秩序。不過重點係個後續：本書嘅副題係The Triumph And Tragedy Of J. Robert Oppenheimer。成也才華，敗也才華。搞咗個彈，亦都帶嚟自身嘅不幸，天才就係詛咒。仲有，亦正如普羅米修斯故事一樣，「世人」（即係指美國人）得到個彈，就不得了，分分鐘會自炒。
9. 套戲嘅高潮，在最後一個鐘，掟原子彈之後。政客嘅嘢，捧得你起，拉得你落嚟。要用你嗰時，當然乜都冇所謂。用完的話，就乜都有所謂。（留意聽證會上有一堆唇槍舌劍，然後音樂越變越大，明顯就係Interstellar嘅玩法）
10. 呢個你可以留意，同年代，大西洋另一邊嘅圖靈，經歷有啲相似。仲要都係同毒蘋果有關，仲要係劍橋校友。不過圖靈基嘅，奧本海默就食好多女。兩個都係戰爭時嘅科學家，為祖國立下大功，但最後畀人迫害。但當然了，奧本海默就冇圖靈咁大鑊，只係被人格謀殺，冇咗政治影響力。而且後來平反咗（正係戲入面有講嘅JFK，後來做總統，雖然個平反只係象徵式）
11. 一介學者，去玩政治，就唔夠啲冷氣房嘅陰險小人嚟了
＝＝＝＝＝＝
奧本海默其人其事：一個食女無數嘅冇耐性天才中產煙鏟
12. 奧本海默其人，戲入面都唔算描述得好精細。冇法，因為要講好多歷史。才華方面應該唔使討論，名校First Hon畢業。
13. 比較特別嘅係，佢興趣好廣，火麒麟周身癮。科學叻，人文學科亦都好熟。外語能力亦強。戲入話佢極速學荷蘭文教書，是真的。不過留意返佢本身就識德文（論文都係用德文，哥廷根嘛，嗰時係物理學頂尖學府），學荷蘭文應該不太難。仲有，佢亦自學梵文，嗰段《薄伽梵譚》「我現在成了死神，世界的毀滅者」，真係出自佢口，不過應該唔係做愛時講嘅
14. 留意返奧本海默出身相當好，屋企收藏梵高畢加索。後來繼承遺產都唔少 （今日計幾千萬港紙啦）。另外，咪話有個牧場咯。人生勝利組。
15. 佢嘅性格，其實比較複雜，有多面性。
16. 戲入面有講佢自負，但冇拍咗好多佢持才放曠嘅情節。自負串嘴就肯定，但同時間如果係佢想討好嘅人，佢亦識得點討好（例如女）。戲入面冇講，但現實最開頭軍頭（即係麥迪文個角色）怕佢未拎過諾貝爾獎，食唔住班科學家。但最後係冇問題嘅，因為佢識好多唔同領域嘅嘢，其他人服佢，而且佢夠風趣 — 見到冇，想討好嘅人，佢係識討好嘅。問題就係多數人佢都睇唔起
17. 仲有，佢係一個大煙鏟，你見佢好多相都拎住煙。最後喉癌，六十歲就死咗。同時間精神健康應該唔多好，長期抑鬱。
18. 同你想像唔同，奧本海默係個極之急躁，冇耐性嘅人。上面都講過，火麒麟周身癮，佢好少可以專注於一件事好耐，亦因為咁佢根本冇心機做一個可以拎到諾貝爾獎嘅論文。多數佢都係玩一陣，又去玩第二樣。冇錯，對女人都係。
19. 性愛場面有冇必要，唔知。但有關奧本海默食女無數呢部份，真係要講。戲入面有講佢結咗婚，都仲同舊情人上床（留意返成百年前嘅社會道德呀下）。佢亦有一舖搞人老婆嘅癮，是真的。戲入面有講啦，佢老婆咪原本係人地老婆，但畀佢搞大咗嘛！除此以外，佢結婚後都仲係好鍾意搞人老婆，仲要係朋友嘅老婆。唔止一次。有次係大名鼎鼎嘅Linus Pauling（中學有讀），係佢老友。人地做嘢，佢就去勾人老婆去旅行。結果人地老婆唔制，告發佢，老友就同佢反埋枱。
20. 呢啲有乜關係？有。因為佢咪就係因為食女惹禍。幾件都共產黨喎。
21. 好啦，政治。實情，由頭到尾佢都係十分左傾嘅，甚至好可能係共產黨黨員。即使唔係黨員，都肯定係堅實追隨者支持者。佢出錢出力出時間去支持共產黨，身邊嘅人（包括食嘅女，包括佢細佬）好多都係黨員，明顯係行得好埋，甚至太埋。但，後來睇返檔案，佢應該係冇賣國冇做間諜嘅。
22. 至於反戰云云，都係有點複雜。佢有講過，絶無後悔整咗個原子彈，從來都冇。佢只後悔用唔切去炸德國，德國就投咗降（佢係猶太人嘛）。佢亦好贊成炸廣島（亦留意返當時美國嘅民間氣氛，基本上當日本人唔係人） — 但對於炸長崎佢係好反對嘅。
23. 我認為不能話佢「雙重標準」「偽善」之類，畢竟呢啲係好複雜嘅課題，甚至佢前後矛盾都唔奇。佢係覺得雙手沾滿鮮血，但再講一次，佢話冇後悔過整個原子彈兼炸咗廣島。佢後來只係希望核不擴散，唔好軍備競賽云云。
＝＝＝＝＝＝＝＝＝
政客當然將你用完即棄，仇家當然借機會搞你
24. 掟咗原子彈，套戲最後一個鐘，就高潮啦。
25. 杜魯門當佢condom咁用完即棄，的確係事實（雖然後來都仲有頒勳章畀佢）。亦都真係同人講「唔想再見到呢件son of a bitch」，不過好似冇走去話佢係cry baby
26. 實情做「曼克頓計劃」嘅領導，當然係要品審查之類 — 而其實FBI一早已經留意佢，早早開咗file．佢老哥咁左，公然在大學宣揚理念喎。
27. 問題就嚟啦，政府一干人，一早知佢係咁嘅人，一早就知有呢個風險。奈何佢真係太勁，於是唯有照用，搏一搏，睇緊啲佢 — 但到完事後，啲嘢上晒軌道啦，冇咗你都得啦。就開始搞你了。就開始樣樣都有問題了 — 當然亦因為原本蘇聯係「盟友」，但之後係冷戰對手嘛。
28. 況且，奧本海默在學者圈中受愛戴啫，但在出面，就得罪人多稱呼人少了。咁大家都知，有啲人係好小器的。就係羅拔唐尼演嗰個史特勞斯了。
29. 呢部份，就真係「莫扎特傳」啦！未睇過？就係講個樂師妒忌莫扎特咁叻，又串串貢，又落佢面，於是咪搞佢。
30. 奧本海默身上發生嘅事，亦都差不多。戲入面刻劃到史特勞斯就係自卑，陰濕，妒忌心重，記仇。現實有幾多係真就唔知。但奧本海默的確在公眾場合落佢面，串佢唔識嘢。方丈好小器的，然後方丈有權喎。所以奧本海默當然係唔識撈 — 但又要埋政治枱喎
31. 史特勞斯要搞奧本海默，除咗私怨，亦都因為政見。首先係奧本海默嘅左翼價值，佢睇唔順眼（共和黨員嘛）。另外就係奧本海默對氫彈嘅立場。後者戲入面有講。
32. 特別留意嘅係，戲入面多次提到，史特勞斯搞場大龍鳳，就只係為咗人格謀殺奧本海默。因為根本唔係正式法庭，所以「舉證責任」唔在史特勞斯（嘅馬仔）一方。真係法庭，要奧本海默定罪嘅門檻相當高，應該做唔到。但史特勞斯根本唔需要呢啲：佢唔使要奧本海默收監 — 佢搞壇咁嘅嘢，就已經令群眾在心中公審咗奧本海默，打擊咗佢嘅公信力，等佢出嚟講嘢冇人理。最後亦都令佢冇法再行使政治影響力。（有趣地，戲入面史特勞斯有講奧本海默就係想要做烈士，我成全緊佢呀。呢部份好可能係導演「小丑 vs 蝙蝠俠」嘅投射）
33. 套戲最尾，收得好好。史特勞斯呢啲就係小人，以為奧本海默在愛恩斯坦面前講佢壞話。實情人地係研究人類未來呀！我諗起莊子「鴟得腐鼠」嘅故事：烏鴉以為人地想食佢隻死老鼠？諗多咗。你以為人地咁得閒背後講你是非？奧本海默同愛恩斯坦嘅級數，先唔得閒去講你呢啲閒人。
＝＝＝＝＝＝＝＝＝＝＝＝＝＝
34. 最後個人感想，成套戲，當然多得本書。成日叫人睇書，都畀人覺得落伍。新時代啦，字都冇人睇，仲睇書？但真係？人地依然有好嘅書，然後就可以拎嚟拍戲，就可以拎嚟賺錢。日本都係咁，最近套《惠子的凝視》都係改編書。
35. 香港呢？well．我可以返去磨墨了
已經1800人 訂Ivan Patreon！（bityl.co/9CyV__0">） comment 都有link
=====
Ivan金融Patreon ，比別人知得多。subscribe now（bityl.co/9CyV__0">） ，可以睇返晒以前嘅文。金融嘢，港美市場評點，月費100港紙有找． 畀年費仲有85折
