［拿著半兜～～凍的真鯛說～～］Happy birthday～～to me
--
［拿著半兜～～凍的真鯛說～～］Happy birthday～～to me
TLDR：先講真鯛，再講我生日。然後講歌詞欣賞。最後講文學。兩千幾字寫晒，呢排真係精簡咗了。
TLDR2：同場加映。女藝人同唱片監製，導演，作曲人搞上（OK，「相戀」），並不罕見。但發唔發現，好少同填詞人搞上？點解？定只係我錯覺？
- 後生讀者唔知，個題係歌嚟的，最尾解。一首我好鍾意嘅歌詞，one of the most underrated
2. 呢兜的確係真鯛，雖然唔係半兜。咁可以填「拿著滿兜」嘅，但冇咁好。當然亦可以食咗半兜先影相，但呢啲嘢，「邊有得做到一半停？」
3. 又，非廣告。真鯛是Donki的，芝士蛋糕都係。Donki VIP金會員喎，一年要幫襯25000蚊。你估流的？
＝＝＝＝
4. 幾個月前，手術又手術，情況不太好，心情不太好。我有諗，到底今年生日會係點？百感交集？冇心情慶祝？定已經盲咗？定已經死埋？（應該唔會，都話一年內自殺保險冇得賠，是真的）
5. 結果，呢刻，既唔係好百感交集，又唔係好冇心情，亦唔係feel blessed。未盲，未死（十分明顯）
6. 生日主要覺得：好忙。仲有好多文未寫。
7. 早幾個月同個朋友傾閒計，嗰時我話寫返文，十分忙，但心情好返。我已唔記得佢exact wordings，但大意就係話，「我都係要忙先搵到意義」。
8. 我估佢嘅意思，唔係話我「勞碌命」。因為我嘅忙，明顯因為寫文。
9. Er……「其實我真係好鍾意寫文的」。常言講Passion，你要證明好簡單，就係冇人畀錢你，甚至冇人畀like你，日日鬧你昌笑你，你都仲會不停去做，年年月月日日咁做嘅，咪Passion．
10. 亦所以啦喎，只要寫得到文，我都仲覺得活著很有意義。
11. 呢個就係呢幾個月諗嘅嘢。
12. 正題講完，下面係歌詞欣賞。一如以往，幾時都係配菜長過正題。正如我副業最後搵得多過本業，正如埃汾太都由小三變咗正印（好多人都知，冇乜咁秘密）
＝＝＝＝
13. 解返首詞。四十以上嘅老嘢會知，葉倩文（＊），《零時十分》。我亦在咁上下時間影呢張相。
14. 作曲嘅係林子祥（＊＊），嗰時好似未搞上，或者搞上中，但未浮面。旋律好簡單嘅一首歌，編曲都極簡單。但照舊，你唔識音樂，我都唔識，況且文字難表達音樂。所以講歌詞。全首歌詞，呢度有：https://bityl.co/Czil
15. For some reason，我好記得呢首歌係林振強填嘅，甚至唔使查。
16. 林振強就填得妙，我就解你知，點解填得妙，文學欣賞
17. 呢首歌詞填得好嘅地方，係略為塞陶（唔係「濕陶」）少少嘅。有啲似我地以前討論過，同樣係林振強嘅《Love me once again》（拿，比較文學呀！）
18. 點題嘅「零時十分」，歌詞第一句就出現，很好，人人都記得首歌叫咩名。流行曲嘛。
19. 呢首歌講乜？好明顯就係講條女（歌者）嘅生日，以前有人陪，而家食自己。
20. 零時十分，就係過咗十二點。妙，但之後仲妙。
21. 「倚窗看門外暗燈 迷途夜雨靜吻路人 曾在雨中 你低聲的說」呢啲不詳解，係舖伏線，下面嘅呼應先正
22. 留意之後嘅一句：「happy birthday my love one」。留意，同《Love me once again》日文原曲原文已有句英文歌詞唔同，呢首唔係改編歌，所以呢句英文係林振強自己神來之筆填的。首歌就係講生日
23. 「為何現今 只得我呆望雨絲」就對應返第一段嘅「曾在雨中 你低聲的說」，物是人非，都係雨夜，但就由兩條友變一條友。妙
24. 但下面幾句，更妙。「呆呆坐至夜半二時」 — 回應返開頭嘅「零時十分」，坐足兩個鐘啦喎。
25. 再妙嘅係，「拿著兩杯凍的香檳說：happy birthday to me」 — 記住，係拎住兩杯香檳。等仔，定只係懷念儀式？
26. 然後個happy birthday，就由第一段，人地講my love one，變成呢段嘅happy birthday to me ！岩布仙尼！食自己！勁！
27. 副歌，冇咁特別，雖然都填得好。「綿綿夜雨 無言淚珠 陪我慶祝今次生辰 綿綿夜雨 無言淚珠 齊來為我添氣氛」 — 用返第一二段，落雨，生日，食自己嘅主題。不停咁重覆的。
28. 但最後一段，我覺得神級，收得好靚！
29. 「無人夜中 穿起那明豔舞衣」，唔係好特別，但留意冇重覆返第一句嘅「零時十分」。其實第二段都冇，用咗「為何現今」，因為成首歌用埋時間flow，第二段已經「夜半二時」
30. 下一句，勁啦喎，「呆呆獨坐直至六時」 — 留意，之前一段係「呆呆坐至夜半二時」 — 妙呀！二時，變到六時。同一個音，而不能掉轉填，因為跟個時間flow嘛。仲有，不能直至二時。首先，嚴格嚟講，「直至」應該故事最尾先用較好，一定跟六時。仲有，你只能夜半二時，不能夜半六時！
31. 真係雞蛋剔骨頭嘅，就係用咗兩次「呆呆」，可能有人認為用「傻傻坐至」「無聊坐至」好啲。但，「咁即係你睇慢鏡話啲球員廢，明明隊友空晒做乜唔交」，「或者好似你地批評我啲文咁」 — 咁叻，自己填一首咯。（「我係咪好波過美斯先可以批評佢？」）
32. 最後，真係妙到最後一刻。「拿著兩杯暖的香檳說：happy birthday to me」 — happy birthday to me重覆咗。咁仲有乜特別？
33. 特別係，夜半二時，係「凍的香檳」。直到六時，就係「暖的香檳」。時間的流逝，正唔正？你話，掉轉填得唔得？如果冬天呢？由暖變凍得唔得？ — 梗係唔得！因為，香檳係凍飲的！
34. 你可以比較下，《三國演義》，關公斬華雄，就用杯酒「仲係熱」，一樣係表達時間嘅流逝，但呢度係表達好快搞掂，仲熱。而關公唔係飲香檳，係熱酒。
35. 犀利。一首歌，咁短嘅詞。講成個故事，有寫景，有時間變化，有物是人非，有成個故事。犀飛利。至於心情？一句都唔使寫。你睇景已經知啦
— — — —
36. 近排我都寫得多歌詞欣賞。其實唔難，但你要幾樣嘢：細心，敏感，同埋有表達能力。呢三樣我有，但唔係個個男仔有 — 所以你發現，評論歌詞嘅，似乎好多係女仔。
37. 你夠細心同敏感，就會get到歌詞嘅精妙。但只係有呢兩樣都唔夠，有啲人係get到，但佢唔識寫出嚟。所以仲要有表達能力
38. 有晒呢三樣嘢，就可以擺脫到只係講「填得好好」「好有意境」「好sad」之類咁空泛。
39. 大家得閒可以試下，下次讚個女仔靚，試下唔好只係講「好靚」「好大波」「好有gf feel」 — 呢個已經過之前兩個，雖然我唔知咩係gf feel，我有個朋友話鄭家純（台灣嗰個，唔係新世界）好有gf feel — 而我冇見過佢任何一個gf有呢個feel．
40. 最後諗起個例子。之前send張女仔相，我個女仔朋友點評，話「唔得」。我問「點唔得」，佢話「著衫唔得」。咁我唔係回「唔著衫好得」，而係再問佢，「著衫點唔得？」。佢再講，「你睇佢條裙，幾咁娘」。我再問，「點娘？」
41. 佢答：「好似金都姐妹裙咁」．咁就明了
42. See？「唔得」「娘」，唔夠精準。「好似金都姐妹裙咁」，就令人深刻。但首先，你要知道咩係金都，咩係金都姐妹裙。
（＊）早排中學同學whatsapp group，有人話搞「鄭家純 x 鄭家純」crossover event，我就話，「不如葉倩文x 葉倩文」。然後再有同學話，「不如王菲 x 王菲」。「你睇我啲中學同學幾咁有文化」
（＊＊）女藝人搞上導演，監製，或者作曲者之類，並不罕見，亦不見得實係潛規則，或者貪方便。女仔鍾意男仔嘅才華，亦不罕見（唔通埃汾太鍾意我靚仔有錢有腹肌？），特別係演藝嘅，你套戲令佢更上一層樓，你首歌打動佢，佢鍾意你，十分合理。但有趣嘅係，大家都話廣東歌「詞大過曲」（事實） — 但點解你好少聽有女明星同填詞人拍拖？點解呢？因為黃偉文同林夕都係基？可能都係。但，其他呢？因為填詞人搵唔到錢？但作曲又不見得好多錢啫？定因為填詞嘅，根本唔會點見到歌者？但作曲呢？又好似會多啲見到？唔知。定根本我呢個觀察係錯嘅，同作曲嘅拍拖，都得好少人？呢條可以拎嚟做面試題目
=====
市好個個都股神，市差先考功夫嘛。手術後重出江湖！Ivan Patreon 跌破2000人！要告急了！比別人知得多。subscribe now（bityl.co/9CyV） ，可以睇返晒以前嘅文。港美市場評點，每星期５篇，月費100有找． 畀年費仲有85折，
富途嘅，用我個開戶碼：9M85BY4D
IB嘅，買啲歐洲股日本股新加坡股，送佢自己嘅股票：ibkr.com/referral/yinha820
華盛，可能都多人未開：vbrokers.app.link/e/ivanli
Webull嘅：a.webull.hk/i/IvanLi
USMART：usmart8.com/kol/r/G6
============
