--
［本周金融大事］姿色改變命運：馮盈盈點解要考CFA？
震憾彈：點解馮盈盈要考CFA？
話你知成件事嘅重點係乜
8萬人考Level I，7萬人 Level II，但 Level III 4萬人唔夠。點解？
歷年考過Level I嘅，200萬人。考過Level III嘅，50萬人
CFA難考，但正係因為難考先要考
不過，考完係唔會升職加人工，或者溝女易啲轉工易啲嘅
咁點解仲要考？「你可以照下鏡睇下自己份CV」
誠意，基本功，息奴寧 — 你係三流大學濕鳩科畢業，就好重要了
CFA？「冇乜特別，咪又係咁」
呢篇文就真係造福世人啦，覺得好嘅，記住訂Patreon
震憾彈：點解馮盈盈要考CFA？
1. 上星期，最震憾嘅金融新聞，唔係聯儲局議息聲明，亦唔係斯里蘭卡「破產」（who cares？不過我可能會寫）。
2. 最重要嘅金融新聞，只得一單：就當然係馮盈盈考CFA。（https://fbook.cc/3yn6)
3. 不過我嘅問題係，做乜馮盈盈要走去考CFA？呢篇解你知
4. 順手同你講埋，識睇睇重點，你估下成單新聞重點在邊？你估下先，試下間低，下一段開估。
5. 重點當然唔係佢老豆或乜，而係：Level 2．你有冇間錯？
TLDR：CFA係好難考嘅，出自我口中一定有說服力。考咗CFA，亦一般唔會令你加人工，或者升職易啲，或者轉工易啲，或者溝女易啲（至少香港唔會）。咁但點解仲要考？
TLDR2：你有樣我都有，你有波我都有，你有大學學位我都有。但我係CFA，你係咪？
震憾彈：點解馮盈盈要考CFA？
6. 首先講馮盈盈，吾友話齋，非常之咁「港」，歷屆冇一個咁「港」嘅港姐。何謂「港」就大家心神領會。而本人呢，一路都十分欣賞佢（translation：成日J），長期讀者應該知道我欣賞佢乜特質，本文就不討論。（你唔知就真係唔好話自己係長期讀者）
7. 好啦，佢做乜走去考CFA？佢冇講，旁人有估。我睇新聞話可能佢失寵甚麼，舖定路轉行。但我係有啲懷疑嘅，因為佢仲好後生，又靚（上面咪講咗「我好欣賞佢」），照計仲係大把世界。
8. 再講白啲，comparative advantage，靚女嘅，使乜讀CFA？你去CFA試場睇下，得罪講句，都係唔靚嘅書呆子多，例如本人。你睇大行做research analyst嘅，情況一樣。靚女嘅使乜做呢啲下欄血汗部門？做得analyst嘅，好多都係窮門學霸，知識改變命運。有家底有姿色嘅，唔使咁辛苦啦。
9. 不過好廢嘅一句：美貌就唔係永恒。你靚，你後生，但總會有比你更後生更「搏」嘅小妹妹出現。而家啲女仔唔係傻的，當然知道呢樣嘢，諗得嚟，差不多架啦。
10. 本人同馮盈盈，都係港大校友，都一樣係second lower（嘻）。照計佢應該OK讀得下書嘅（我當佢Level I 一次pass啦），聽講話DSE 五科28分，還好 — 唔係我串或要求高，而係你可以睇下考CFA嘅係乜人，陣間咩解
11. 既然讀到下書嘅，成件事就好合理。未必要即時「轉行」，但「食住等」係中國人美德。正如上面講，當然係靚女，但一街都係靚女，總有更後生更搏嘅。自古美人如明將，不許人間見白頭。玩多五年十年後，你點跑出？當然都係靠包裝，靠定位，做「才女」，各施各法。
12. 咁你有個CFA，又真係大啲edge啦。就算繼續做藝人，我當你第時代言金融產品又好，做理財節目又好乜都好啦。有就係有，我有你冇。特別係而家求其讀個濕鳩Master，都會畀人話係「高學歷港姐」，夠晒濫，唔易突出的。
13. 一句，你有樣我都有，你有波我都有，你有大學學位我都有。但我係CFA，你係咪？
14. 呢個，咪見到個edge！
話你知成件事嘅重點係乜
15. 頭先講，重點係佢話會再考Level II，「咁就唔係講玩啦」。因為Level II真係深過Level I 好多，歷來好多人都係死在呢度。你見王維基個MT（而家唔知係咪），當年都只係要求啲友考個Level I — 佢都深知道，考個Level II都真係唔易
16. 費事開名，但歷年好多咩高調話去考CFA嘅，輪后牙醫金融小化，考完Level I就無聲無息85000。有啲Level I都肥埋嘅就唔好意思出聲，自己都醜。但相信大多數都係死在Level II．而同樣地，once 你過到Level II，Level III亦唔會太難，只爭埋門一腳，個個點都死掂佢。相反，考完Level II，衰得兩次嘅，會發現真係太難，就好可能放棄
17. 唔好咁低層次，睇passing rate。你要諗下同你爭嘅係咩人先得架！唔好以為50% 合格率就係你有一半機會合格。你諗下你會考，同A Level，好似合格率差不多，但點解絶大多數人都降grade？因為同你鬥嘅人唔同咗！最水皮嘅嗰啲出晒局，「你咪由原本中游，變咗水皮嗰堆」
8萬人考Level I，7萬人 Level II，但 Level III 4萬人唔夠。點解？
18. 我有實數畀你睇。由左至右，Level I，II，III．每個Level總考生，合格，肥佬，合格率。
考過Level I嘅，200萬人。考過Level III嘅，50萬人
19. 疫情前，8萬幾人考Level I，然後7萬幾人Level II — 但去到Level III，4萬人唔夠。剩返啲友去咗邊？你睇埋歷年總人數，仲有趣。考過Level I嘅，200萬人。考過Level III嘅，50萬人
20. 所以，祝馮盈盈好運，Level II係好難考的，但至少佢唔係考完個Level I就扮「考咗」嘅人。舊文貼過，Don’t bother putting CFA Levels I or II on your CV in Asia （https://bityl.co/D9Yo）
21. 講馮盈盈就呢度講完。下半篇答埋你，人人都想問嘅問題：
22. CFA難唔難考，有冇用。考唔考得過，做乜要考
＝＝＝＝＝＝＝＝＝＝
CFA難考，但正係因為難考先要考
23. 都唔記得講，本人正係CFA Charterholder。「如果馮盈盈師妹有需要可以搵我簽」。
24. 香港人好實際嘅，差不多每個讀者都想問：CFA難唔難考？有冇用？其實亦即係問，考唔考得過？做乜要考？
25. 我之前寫過兩篇文，相當受歡迎
CFA難唔難考？考唔考得過？ （https://lkdin.io/3m2c）
CFA難考，咁做乜仲要考？ （https://lkdin.io/3m2d）
26. 難唔難考？就梗係難考。馮盈盈話齋，Level I對好多人嚟講輕而易舉，特別係讀金融Degree嘅人。但去到Level II就唔係講笑。本人會考30分，A Level 4條A，CFA Level I我溫都冇溫，但我都話Level II難考，夠說服力啦？但正如頭先講，Level II搞得掂嘅，Level III你實會發揮小宇宙搞掂的，一次唔得咪兩次，兩次唔得三次，只爭一步，好少人放棄。
27. 冇錯，係好難考。咁啲人問，做乜要考？留意個邏輯：唔係「因為難考 所以唔考」，係「因為難考 所以更加要考」。樣嘢太簡單嘅，有乜價值？你唔見人考到個地產經紀牌上網出post鳩威？你拎個大學學位，好基本啦。但正係因為CFA難考，先要考嘛。
不過，考完係唔會升職加人工，或者溝女易啲轉工易啲嘅
28. 考嚟有乜用？我舊文寫過。夠晒潑冷水，但你「以為」會發生嘅嘢，絶大多數都唔會發生。至少在我身上冇發生
29. 加人工？肯定冇。「減人工就有份」 — 因為你啲仆街同事實屈你請食飯。我從冇「因為」個CFA而加人工，舊文寫過，加人工最好嘅方法，甚至唯一方法，就係搵份新工。一係你過塘，一係你用嚟兇你舊老細。靠公司自動自覺加你人工，就含得撚（https://lkdin.io/3m2e）（原諒我咁粗俗，但呢篇文好受歡迎）
30. 升職？亦係冇嘅。我歷嚟咁多個直屬上司，冇一個係CFA，一個都冇！滿意未？我仲要係做research喎，都冇一個老細係CFA。你其他部門更唔使講
31. 型啲，易啲溝女？可能會，但在香港應該唔會，香港人就好視實，唔睇呢啲。我應該冇一個女朋友一齊之前知我係甚麼CFA。你去台灣或者日本可能會有用，或者澳門都得，聽講得幾十個CFA。下次你試下去桑拿話自己係CFA睇下有冇折
32. 易啲轉工？理論上可能會，實際上我相信都唔會。固然有人同你講，「其他嘢一樣嘅，我揀個有CFA嘅」，係，理論係咁講。但實務上，係唔存在「其他嘢一樣」嘅，「每個人都有佢特點」嘛！赤裸啲？你叫低1000人工已經不一樣，或者你對高踭鞋高一寸，件衫扣少一粒鈕，就已經唔係「其他嘢一樣」。而我估呢啲東西值公過個CFA，搵日做實驗。
咁點解仲要考？「你可以照下鏡睇下自己份CV」
33. 舊文寫過點解，重新包裝一次，主要係因為：表達誠意，同埋，請嗰個知道你唔會太過唔係路，唔會太過甩皮甩骨
34. 大學學位原本都係類似嘅功能，但因為太濫，太多阿豬阿狗大學嘅濕鳩科（自己對號入座），印得多就唔值錢。所以啲人唔信你個「大學學位」，但（暫時）信CFA — 正係因為佢難考，唔似大學咁，啲廢柴都畢到業（例如我）
35. 以下三點，可能係同一樣嘢。但，誠意，基本功，同埋息奴寧
誠意，基本功，息奴寧 — 你係三流大學濕鳩科畢業，就好重要了
36. 誠意 — 個個都話想入行架啦，特別係做金融嘅，十個有九個都無恥，講大話唔貶眼（例如我）。個個都話自己有誠意，你點證明誠意？但你會去考個CFA，咪證明到咯。證明到你叻，或者證明到你肯付出時間，唔只係玩玩下，可能聽日又想轉行做第樣。留意，呢樣嘢，對於剛畢業嘅犬學生，或者想轉行嘅人，更加重要 — 呢個咪馮盈盈嘅 case。N咁多條女都話想轉型架啦，但你肯付出乜先？要畀人睇到嘛
37. 第二樣，基本功。仲簡單。即係我就唔會信咩大學畢業架啦，但至少我請個CFA返嚟，我可以知道呢條友，點都識少少嘢，唔係甩皮甩骨，唔使26個字母教起
38. 第三樣，息奴寧。同上面有啲相似，但又唔係一樣。我就當即使份工用唔到CFA嘅嘢 — 但至少，你考到CFA嘅人，點都有一定嘅traits。例如至少佢係識字嘅，例如至少佢唔怕睇字，例如至少佢捱得下，可以大學畢業後仲拎時間去鋤書。
39. 你要明白，呢啲東西，如果你係耶魯哈佛，絶對唔需要。但閣下間三流大學嘅濕鳩科畢業（馮盈盈梗係唔係，「因為佢係我校友」），或者你做緊第二行，然後又嚮往金融界聲色犬馬紫醉金迷嘅假象想轉行，你就十分需要呢啲嘢了。明冇？
40. 以前做副手時，耐唔耐都有啲大客啲世侄仔世侄女之類，話想「入行」，可能暑假嚟做煙腸。係呀，個個都話有誠意的，但，猜兩板，叫你朝朝八點返嚟開會，叫你睇次招股書做個summary嘅，好多都投降啦。同一道理之嘛，老豆有米嘅，使乜做呢啲下欄嘢？你話你有誠意，你就真係未見過真係好有誠意嗰啲小朋友了。人地窮家出身，係唔同的。
CFA？「冇乜特別，咪又係咁」
41. 最後都忍唔住要講多次，「其實我原本想唔續CFA會員了」。舊文有寫，如果我由第一年開始，唔交會貴，拎晒啲會費去買盈富基金，而家連本帶利應該有5萬幾蚊，拎去買SPY或QQQ更不得了，應該有十皮嘢。
42. 不過見佢減咗價，我又續多年。
43. 的確，到你入咗行，甚至已經「上咗位」（我定義為：你去到啲可以肥上瘦下，參與或旁觀分餅仔遊戲），就唔使再要呢啲嘢啦。
44. 事實如此，你係咪因為我係CFA先睇我篇文丫？唔係嘛。我寫明係為免有人弱智到話「你又唔係CFA你有乜資格講馮盈盈」（但，明明又話唔使好波過美斯都可以批評佢屎波）。正如，如果你得我寫啲嘢垃圾嘅，我大你話「我係CFA你係唔係？」，你一樣會話「CFA又點？有乜咁巴閉？」
45. 所以，我就話你知，又真係冇乜特別，「咪又係咁」。但咁多年嘅核心價值都話你知：你去到嗰個位，你先以講呢句嘢。「港大精算？咪又係咁，冇乜特別」「CFA？咪又係咁。冇乜特別」「大行分析員？咪又係咁。冇乜特別」
46. 呀，覺得我寫文好睇或者有用嘅，記得支持我Patreon，兩個支持晒最好。唔知有乜分別或只能只想一個嘅，「咁梗係貴嗰個啦」
=====
月頭訂最抵！手術後重出江湖！Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，每星期５篇，月費100港紙有找． 畀年費仲有85折，
===
君子馬蘭頭 Patreon．就只係貼返Facebook Page嘅文，包你唔會miss post，同埋畀唔睇金融文嘅你支持我。月費港紙30，一日一蚊。（bityl.co/D2eW）
