第三刀

［第三刀］唔好意思，硬係週末就影響大家心情。不過一如以往，你估我想架咩。況且亦都只能而家寫，冇得遲，冇得早。今次真係唔咁長氣。

TLDR：星期一又開多次刀。前後第三次，幫你數埋。不過今次局部麻醉，唔住院。呢篇係短期內（一兩星期內）最後一篇文。嚟緊一兩星期應該所有嘢都停，專心休息。頂多得閒出短post update下

1. 繼續我maximum transparency 嘅作風。當然我知道好多人都想我「親口」講，但唔係好…..實際。赤裸啲講，你可能好關心，但我PM未必即時想起你。掉轉，我冋你講嘅，你又可能未必想知，仲覺得我煩。所以我依然覺得在呢度講比較好，有個「距離」，你得閒先睇。睇完想再同我傾想問嘅，當然可以（斷估你忙過我），覺得唔想聽嘅，咪靜靜地unfollow，冇嘢的。

2. 可能而家真係老咗。以前就好中二嘅，出個post，自己有事。喂，邊個邊個冇理嘅？我當佢好好朋友喎，幫過佢好多好多喎，佢又明明有睇。但而家諗得寬容咗，會對你好關心下甚至真係幫到嘅，十分感激。冇嘅，亦都冇所謂，人地自然有人地理由，可能人地開心快活，唔想聽呢啲嘢，好正常的。真係冇問題的 — 即係，冇幸災樂禍踩多腳嘅，已經幾好啦

3. 總之，唔好老奉覺得人地要對你點好。

4. 但話說回頭，有啲友呢，會私下問我。喂做乜忽然開刀都冇聽你講（之前講咗好多次喎），喂你在台灣開呀？下你唔係去咗台灣咩。咁我其實真係唔多明，係關心嘅，知我近況唔係好難啫？我冇要你所有文都睇丫。但甚至，你問下其他朋友都會知。

＝＝＝

5. 先講醫生嗰部份，亦係我最唔鍾意講嘅，唔係我介意，係趕客。但亦必然要講。

6. 話說上星期六，入咗浸會醫院，做咗全身麻醉，眼入面插咗支管，去水，降眼壓。詳情睇舊文（ggle.io/4s6T）。咁然後點？大家同我都最關心，手術成唔成功。但，就唔係咁簡單。

7. 手術後，星期一覆診，很好。星期三再覆，麻麻地，眼壓升，但仲係安全水平。星期六再覆，再升，去到不安全水平。咁所以，咪星期一再開刀，咪有呢篇文。原本醫生叫星期六即開，但涉及要人接我同陪覆診嘅問題，咁醫生再諗，又覺得唔爭在嗰兩日。

8. 你可以話個情況同第一次開刀（一月尾）有啲似，亦係開完嗰下梗OK，覆得幾次診就唔掂。咁但當然兩個手術唔同，雖然後果都係差不多。

9. 點解會咁呢？醫生都講過下，我都唔係好明，總之就係條管移咗位之類，仲有可能係我既個人體質問題。咁星期一，就做個局部麻醉，開返隻眼，放返正支管。然後希望OK，如果唔OK呢？「咁就應該有第四次」，放條新管，或者試第個位咁。咁聞說可能就會全身麻醉了，雖然我都唔係好明「放返正」同「放過條」係咪咁大分別。

10. 而上次（第二次，浸會醫院）個手術，都係「可以」局部麻醉的。咁肯定對醫生嚟講，局部麻醉變數多啲，都話開咗隻眼中途你打個乞痴都幾煩，同埋，局部麻醉中途我就會痛（雖然我唔知有幾痛，好難量化，星期一後有機會話你知），但局部麻醉亦有三個好：第一，上次住醫院唔多愉快。第二，平啲（保險已claim 爆），第三，快手可以做到。入院至少又等兩星期

11. 星期一會發生嘅事：朝早埃汾太同我去診所（唔使入院）做手術，一兩點搞掂，包住紗布（完全睇唔到嘢，有冇人唔明咩叫完全睇唔到嘢？），所以當然要佢同我返屋企。然後第二日返診所，拆紗布。之後又係覆診，希望個眼壓唔再升。再升點算？咪可能第四次，換過條管，咁啩。

＝＝＝

12. 想講幾樣嘢，第一，今次我會真係專心休息一兩星期。因為完全唔想再出現之前兩次嘅情況。特別係第二次（即係剛剛上星期），你見我浸會出院，話咁快已經照樣日日寫文睇報紙（網上啫）寫Patreon

13. 一般人都會講，「唔好心急，休息下」。但實情當然唔係咁簡單二分。第一之手術後我都真係停咗多日，最後眼壓都彈返。客觀見到嘅係，Patreon啲讀就閃晒。呢個就真係一個問題，特別係正如上面講，保險都claim 爆了（冇計，買得早，買得細），而家全部自己錢。

14. 但，點解條管會移咗位（咁化學嘅？），就真係講唔清，今日（星期六）問醫生佢都比較趕時間，我可能星期一再問。到底係我體質嘅問題丫，意外嘅因素丫 — 定真係因為我手術後仲走去半夜寫文呀，瞓又瞓得唔好呀咁？

15. 多數問醫生，都畀唔到咩肯定嘅答案，「最好你乜都唔做」「但都唔包真係實冇事」。咁但，我就真係想排除晒所有其他因素。所以，呢兩個星期，唔會再寫文，甚至會半消失於網上（當然你WhatsApp我我都會睇嘅,）

16. 最後一講，我「睇到嘢」「寫到文」，同我個病情好返，就真係兩回事。甚至好可能因為我自己覺得「寫到文」，就反而掉已輕心咗。定根本唔關事？唔知＝

17. 我記得之前有啲Patreon讀者，都有啲微言，見我Facebook 照樣寫文，又唔寫Patreon。「喂你識整電腦就識整微波爐架啦」。好啦，而家Facebook Post都唔寫，滿意啦？人人都冇魚蛋食。

18. 冇錯，我連波都唔會睇（仲有場歐聯八強），不過我會日頭睇返，所以唔好PM我講我知賽果。一切都係為咗我想「專心休息」

19. 「專心」咁休息。固然咁不等於之後一切順利，但至少我可以講，要做嘅，我都做晒。至於天意呀，基因呀,，體質呀呢啲，我控制唔到。心甘命抵。

＝＝

20. 帶到第二個問題，「樂觀」。我一路都覺得自己係樂觀嘅人。雖然我之前寫咗篇長文（好睇，請睇：fbook.cc/3rLD），入面講到可能自殺，講埋身後事咁滯。但我依然覺得我係樂觀嘅，只係諗下最壞情況。

21. 可惜情況就真係朝住個比較差嘅方向發展。都唔使講咁多，你見手術做咗幾次，咁可行嘅方法越嚟越少。錢又洗咗，時間用咗，工又停咗，苦都受咗啲（暫時唔太多），精神上亦受到一定壓力。當然情況唔係太好。

22. 但，你見頭兩次手術，我都仲係幾樂觀，睇文感覺到的。我都仲係覺得，「抖兩抖，畀啲時間，好快又回復以前咁」

23. 呢個亦係一般人會叫你做嘅嘢，總會叫你樂觀。我都有，但真係要講，反而有時令我更唔開心。因為之後發生嘅事，同我嘅期望，有啲唔同。

24. 兩次手術都係，做完梗係相當好，做完幾日都好，但隔得一兩星期，就唔好了。咁你想像到，我個心情起落會係點。

25. 所以，定係我應該選擇唔好咁樂觀？但亦似乎唔係好幫到件事，「只會再早幾日唔開心」

＝＝＝＝＝＝＝

26. 仲有，事情發展到此，當然又講下埃汾太。

27. 正如我上次篇文講，你照顧過病人嘅，就知相當唔好受。我冇照顧過，但我見過。而家我就做病人。

28. 你可以想像到，我呢排啲心情當然唔會太好，好多嘢做唔到，要人幫。咁而埃汾太仲要返工，咁唔多唔少，會令大家多咗啲磨摖。其實冇乜嘢，好正常，應該得啲十幾歲嘅小朋友，先以為拍拖或結婚，係會冇口角的。我們很好，暫時都仲幾好。

29. 今日可能又因為啲無聊嘢（唔講太詳細了），又搞到有啲唔開心。我同佢講，我都唔想咁的。

30. （以下呢啲嘢當然我親口同佢講咗，唔係叫佢上網睇）。我話，而家你都已經唔係幾開心，咁如果我情況再差，點算？你只會越嚟越大壓力。

31. 而我，就係唔想見到佢咁。特別唔想係「因為」我搞到佢咁。

32. 當中唔係咩我好錫老婆我係絶世好老公之類（雖然我覺得我對佢都算幾好），而係等於你見《淪落人》黃秋生講（大意）：喂，咁你日夜都靠佢照顧，你唔信佢，仲可以信邊個。

33. 所以我唔信佢，仲係邊個？靠我老母？（繼續豹隱中）（連佢口中最人渣嗰個前夫，即係我老豆，都有伸出援手，原本星期一佢會接我，但後來埃汾太請到假，就唔使）（當然我老母嘅講法好簡單：你地呢啲咁嘅人梗係臭味相投）（大意，佢講過類似嘅嘢）

34. 我唔想件事搞到大家越嚟越唔開心，呢個係我舊文寫嘅嘢，冇乜變，甚至（不幸地）向緊嗰個方向。

35. 如果冇事冇幹嘅，當然好。咁而家如果我係「抗病」或「康復」途中嘅，有佢陪我支持我亦很好，即係而家咁。咁但，乲後呢？如果真係一路好唔返，點算？如果之後真係變盲，咁點算？

36. 呢個分為，我點算，同佢點算。

37. 我暫時冇乜其他好大嘅病痛，咁青光眼（我而家嘅病）當然唔會致命，「最多變盲」。咁話晒都儲咗啲錢，雖然手術都用咗啲，咁但，即使埃汾太辭埋工全職照顧我，照計我擺多十年，廿年，都唔係好大問題。

38. 但我亦寫過，咁嘅嘢，有乜意思？What’s the point？我都已經覺得睇唔到嘅嘅生命不值得過（至少我呢刻係咁諗，你用其他人同我講，又冇乜意思的），做乜仲要拖累佢

39. 冇錯啦，就係「拖累」。好似好禁忌，但你無法迴避呢樣嘢，唔係唔講佢就唔存在。照顧病人，就係咁架啦。佢當然話唔咁覺得，但，情況繼續差呢？五年呢？十年呢？

40. 我亦都講過，佢應該係有岛己嘅人生嘅。

41. 今年係我結婚十周年（噢耶），正路地都仲會一齊過。但用一個正常嘅合理預期，似乎唔應該預期佢結婚十年，就要照顧我之後唔知幾多年。好似好搵笨。

42. 況且，我都唔係好肯定，我有冇畀佢「享福」。當然我唔覺得我對佢差，亦都有過開心嘅日子（而家都仲係），佢之前幾年都在家唔使做嘅。

43. 但總之，我個想法都係冇變。而家有得搞當然搞。但到冇得搞時，就唔好不停咁延長（自己覺得）冇乜意義嘅生命。浪費自己時間，拖累人地，亦都嘥錢。你同我都識講，生命嘅意義似乎又不在乎於長度，當然我唔係完全無憾，但亦肯定唔係覺得要不惜一切咁延長佢。

44. 再強調，有得搞當然搞，佢同我一齊都仲好開心。但，到我情況越嚟越差，或者真係變咗盲人，件事就肯定唔係咁好玩。咁我早啲死，剩低嘅錢，就真係夠佢慳慳地之後都生活無憂，又有更多佢自己嘅時間。

45. 反過來講，我拖多十年，廿年。錢又會用咗，我又唔覺得會開心，仲要搞到佢都辛苦埋，為乜？我唔係好明。

46. 其實上次篇文都係寫呢啲，而兩次手術都不太成功，明顯個情況係向個唔太好嘅方向發展。但我都仲只係講返差不多嘅嘢，冇更灰，所以其實都係幾樂觀。

47. 所以找唔係話呢啲嘢好大機會發生，或者會在短期發生。但首先，「個機會好似大咗」。

48. 另外，我亦唔想有人覺得，我「忽然」有咁嘅想法。實情好多人嘅各種「想法」，唔係「忽然」。只係可能佢冇自覺，或者唔得閒諗（呢排我就好得閒諗），或者冇講畀人知啫。

＝＝＝

49. 好啦，話唔樂觀，實情都仲係樂觀。星期一搞唔掂嘅，咪可能第四次，真係插條新管，做多次全身麻醉（老死都帶多幾支水）。再唔掂嘅？當然我未問醫生，但某程度上，成個三月未入院前，我都係滴眼藥水同食藥控制住眼壓。當然話長食未必好，但到無晒方法，照計呢個都係一個不完美但可行方法。咁梗係有副作用啦，胃痛啦，食慾冇咁好啦，中長期對心對腎都唔好啦。咁但，「都仲好過即時盲埋嘅」。至少仲可以去多幾次日本，係咪？

＝＝＝＝＝＝＝＝＝＝＝

50. 你可以做嘅，好簡單，當然係繼續訂Patreon，而家就真係要用到自己錢啦，保險爆晒了。我應該兩星期後會寫返。但今次真係唔想急。

51. 另外，認真的，長遠嘅，希望大家可以好似支持我咁，支持埃汾太，各樣嘢。

52. 仲有，可以嘅話，陪佢傾下計吧，我都有叫佢搵人傾下計。佢好似唔係好多朋友，我都話，嫁咗我十年，佢連自己嘅生活都冇乜。呼。

＝＝＝＝＝＝

53. 呀最後，小口角後，當然好快冇事。埃汾太講返，要「相親相愛」

54. 呢個東西就有啲典故，因為係當年（冇錯係那些年）在九份放天燈時畫嘅嘢（邊年？曼城首次拎英超嗰年，其實直頭係嗰一日，都話我可以將啲事件用其他嘢記返住）。

55. 唔講猶自可，一講呢。嗰埘個天燈，四面嘛。我仲記得另外三面寫嘅嘢。

56. 首先係，六合常中。咁，都中過幾次安慰獎嘅

57. 另外，係四十退休，明顯冇做到

58. 仲有，係勞蘇快高長大。當然玩具熊係唔會長大的。

59. 所以你睇，控制到嘅嘢，真係比你想像中少。唯獨係「相親相愛」，都仲勉強可以控制住。咁所以，就唔好搞到壇嘢好核突了。

60. 我唔會叫做「陰影」，但我阿爺死前，就係非常暴躁，然後我阿麻又哭哭啼啼咁。呢個唔係我嘅陰影，但因為當時正係青春期（中一二之類），嗰時又成日見佢地，硬係印象好深。不過幸好都唔好搞咗好耐就死咗，兩三年？視乎你點量度，但總之唔係嗰啲病足十幾年嘅。阿麻更好，有福氣。並冇太短命（阿爺好似短咗啲，六十幾？我都唔記得，但阿爺死咗後，阿麻仲活多咗廿年），又冇太長命，去之前仲係健康相當好，十分精靈。然後「發病」後好快就去埋，似乎乜受咩痛楚。

=====

重出江湖！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，