[Dream Catcher]論盡我老母

［論盡我老母］好吧，男人心，一字馬，講過要做得到。就寫佢老母，I mean，寫我老母。一萬一千字，我係一take 過打完的，好似係個人紀錄。因為實在太長，所以我放咗上medium，你可以斬件慢慢睇。

1. 即係呢，有時啲人相愛又未必會一齊，一齊又未必相處到。咁何況，大家都唔多妥嘅呢？可能佢，可能我，都曾經想，唔好變成咁。咁但，不過就會總係咁，咁所以，都不能強求想像中嘅嗰種La Dolce Vita，正如我嘅「彼岸」，都係同靜岡蜜瓜或者濱崎步咁，曾經有啲接近，但最後都係觸不到。

TLDR：打從我第一次要開刀開始，我老母就豹隱咗。不，其實再之前已經豹隱。勞蘇問咩係豹隱，有冇熊隱？獅隱？

2. 如果你係我老母，或者啲親友之類，我就勸你唔好睇落去。同樣地，如果你係我老豆或者佢老婆，都唔好睇落去。我嘅本意唔係要公開數臭或者控訴任何人，但有可能有呢個副作用。況且，如果因為篇文有可能傷害到某啲人，我就唔寫，咁我大約以後唔使寫文。

3. 仲有，任何情況都係，男女又好，朋友又好，屋企人又好，講真，真係清官難審家庭事，真相？誰的真相？你問我老母，我保證你聽到另一個故事，佢個仔點樣由細個好乖變成而家一個人渣。唔存在咩講大話嘅問題，narrative之嘛，況且有啲嘢隔咗多年，佢或者我嘅記憶都可能變咗。你以下聽嘅，只係我片面之辭，我盡量分返開邊啲係我嘅想法，我嘅估計，邊啲真係發生過，可以驗證到。你應該信我，唔應該質疑我講大話，但亦不代表你心中真係要照單全收。

＝＝＝＝＝＝

4. 對我嚟講，寫嘢有多重嘅目的。自high係一種，建立到知名度搵到錢係一種，等大家知多啲嘢係一種。但幾明顯地，同其他人比，我寫自己嘢比較多嘅，特別係打從做咗第一次手術後。

5. 因為寫文對我嚟講亦係一種治癒兼自癒。況且，在我好多嘢都做唔到（睇書，睇戲，睇報紙）之下，寫呢啲文，令我Feel connected，Feel alive，覺得自己存在。舊年我睇咗吉澤明步（冇錯係拍AV嗰個）嘅自傳，咁你想像到，日本拍得AV嘅女仔，出身唔會太好。但佢有寫，一方面拍片自然唔係好受，但亦係令佢覺得自己「存在」嘅一刻。之前睇過啲賣身嘅女仔寫嘢，都有聽過類嘅嘢。呢種「feel alive」，旁人覺得好虛無，但當事人又覺得實在。

6. 呢篇文，已經遲咗太多寫，唔係話幾年前我已經忍無可忍嗰種，而係，我應該早兩個月寫。

7. 拖到今日先寫，固然因為我聽日就入院開刀。上次整咗篇好似成萬字嘅文（未睇過嘅睇下，入面諗嘅嘢都冇乜大變，當然有小變，遲下解）（https://fbook.cc/3qa4），今次希望唔好咁長（結果事與願違）

8. 點解係兩個月前應該寫？好簡單，手術同食藥等等，打亂咗我原本已經有點亂嘅作息時間。原本唔係好大問題，但，我開始發好多夢。我原本已經係一個發得多夢嘅人，而家可能因為瞓得唔太好，更多夢，一晚幾個都好常見。

9. 我嘅夢，好多情節，有時我會記得。亦因為埃汾太朝早會搞醒我幫我滴眼藥水質我食藥先再返工（幾咁好），我就會同佢講啲夢。春夢，係唔多嘅。比較多我會夢見朋友，舊同事，甚至一啲當年明明唔太熟嘅人。

10. 但，我呢排經常夢見我老母。其實以前都有，呢期特多，超過十次，咁我做完手術都只係兩個月，即係差不多一個星期至少一次。

11. 我並冇重覆咁發同一個夢，一直都冇，但，我夢見我老母，差不多每次都係差不多嘅主題。地點場景有變，但主題冇乜變

12. 主題就係：我不停咁鬧佢。記住，係我鬧佢，唔係佢鬧我。好多時鬧埋佢啲姐妹，即係我阿姨。呢啲代表乜，留畀眾多解夢大師。然後多數都係我鬧到最激動時，就會醒咗。

13. 我諗呢啲惡夢，暫時未令我極之困擾，至少我諗都冇諗過要咩睇醫生（仲睇唔夠？）或搵專家傾嘅地步，但亦困擾到令我要寫呢篇文嘅地步。而且，去到後期，即係呢排，好多時我瞓唔著，就係諗緊點寫呢篇文。即係，我眼光光時諗呢篇文，瞓得著時就發惡夢。

＝＝＝＝＝

14. 除咗因為我經常發類似嘅惡夢外，另一個原因亦因為，上次嗰篇萬字長文（https://fbook.cc/3qa5）出街後，有個讀者（女嘅添）同我食飯，講起篇文。講起我嘅「死前待辦事情」，咁可以係好正經，例如馬蘭頭獎學金。可以係好無聊，例如要食明星（唔係海鮮酒家，just saying），或者現場睇一次濱崎步（而個有趣點係，我根本唔係特別鍾意佢）。

15. 但佢十分敏銳，唔止留意我話「要做」嘅嘢，佢有留意，我有乜嘢冇講「要做」。

16. 佢婉轉地問，「冇諗住同你老母修補返個關係咁？」。我當時心中大約諗嘅係「補佢老母」或者「痴撚線，應該係佢嚟同我道歉」。當然呢啲只係我十分自然嘅防衞反應（好多人都話我係箭豬），但，即使用返溫和啲嘅詞語，我嘅想法，都真係冇變。呢個咩修補，完全唔在我考慮之中。

17. 修乜補啫，處女膜咩。我係修補，就修補咗個角膜先（這是十分認真啲，遲下解，但呢個正係我呢兩個月睇嘢都唔清楚嘅原因）

18. 可能我曾經有考慮過，但已經剔除咗呢樣嘢，不在agenda內。況且，加埋後來發生嘅事嘛，都話我由上次做手術開始，佢都冇理過我，一句都冇。如同人間蒸發咗一樣，但根據我所知，佢應該在一個行都行到去我屋企嘅位置。

19. 對，去到呢個位，你可以話係我唔化，執著，硬頸，我又冇主動搵佢，「總要有個人行第一步之類」，都有人講過，你可以再睇落去，睇下嗰個會唔會係我。但我並非一時衝動，到呢刻我都覺得，「仲要我去補？」，梗係佢嚟低聲下氣先啦。

20. 以下係我嘅想像，但，你話當我諗住自殺前做嘅嘢嘛，但佢可能唔知架喎，當我低聲下氣搵佢，喂，佢仲畀說話我聽嘅，我真係驚會有倫常慘案喎 — 你唔好忘記，我本身都諗住自殺架喎。咁你當然話，扯，呢啲你自己假設啫，我之後會試下說服你，話你知點解我有咁嘅假設。

＝＝＝＝＝＝

21. 睇到呢度，可能你會好TVB咁講句，算啦，大家都唔細，你老哥又咁情況，以往邊個啱邊個唔啱都好，抹咗佢啦。我都係同意的，

22. 咁，其實原本咪有個咁嘅機會咯，即係如果佢有事，我係會去見佢的。

23. 但，而家我有事，佢去咗邊呢，你估？拿，呢部份，就真係令我非常介意，而亦真係發生在嗰篇長文之後（篇嗰篇文時我未做手術嘛）。

24. 我老母知唔知我咩情況？梗係知啦。佢點知？總之佢會知，我個妹應該會同佢講。講真，如果佢真係唔知嘅，咁我錯，我同佢當面道歉。

25. 但，個插曲係，唔知年三十定乜。總之，我做完手術，覆診啦。可能塞車，遲咗啲。咁診所會打畀我，但我當然冇聽到。然後診所就打畀「緊急聯絡人」，而唔知知點解，就打咗畀我老母！

26. 咁當然，係因為我填咗佢個名同電話啦。咁你可以問，做乜我會咁填？咁話說我第一次睇呢個醫生，都幾年前，當時未反枱嘅。雖然我懷疑可能我填咗兩個，第一個填埃汾太，佢地搵唔到，先搵我老母。咁以當年嘅情況，如果填兩個，填完埃汾太就係填佢，都好合理。亦證明當年（2017咁上下），件事未去到咁嚴重嘅。

27. 咁所以，佢有冇可能唔知呢？我就好有疑問。而一個遺憾就係，我根本唔知當日佢點同診所姑娘講。姑娘嗰日同我講返呢件事，我係噢撈咁嘅樣，咁姑娘大約都係話，「我都係覆述佢講嘅嘢啫」，但好似佢未開始講，就另外有個病人有問題叫走咗佢。到呢刻，我老母講咗乜，都係一個謎。我一路覆診，有幾次都想問返姑娘，總係開不了口。我有損友估，「我冇生過呢啲咁嘅仆街仔」，too sentimental啦，我估比較接近真相嘅，應該係「我冇同佢聯絡好耐啦喎」之類。

28. 仲有，沒有比較就沒有傷害。我個人就係記性太好。後來我諗起件事：早幾年（未反枱的），佢細佬，我舅父，在北京（舅父長期在香港，不過咁啱有事返去幾日啫）出咗啲事，暈咗，入咗醫院咁。我老母好似即日，定第日，就坐飛機上去探佢啦。我點知？因為佢仲打嚟同我講，雖然我唔知佢嘅用意係乜，可能話我知佢有幾日唔在香港啩。我唔知佢同佢細佬有幾好感情，但憑我觀察想像，係好但唔係極好到點生死大義嗰啲。而我老母係好怕/好憎返大陸嘅。

29. 好啦，兩件事，拍埋一齊。你可以想像下我咩感受。

30. 各位網上嘅陪審團，我想講嘅嘢好簡單。就係，我覺得真係太過份了。雖然我嘅期望已經好低（正如佢對我都係），但都仲係可以突破，好嘢。當然尔可以話唔知我之前做過乜，但我嘅論述係：無論我之前做過乜，佢都係唔應該咁。亦即係類似講嗰句：邊個唔啱都好啦，唔好再拗啦。

31. 我將呢個故事同朋友講過，當然有人會講，喂，咁你又冇通知佢嘛，你又冇叫佢睇你冇叫佢乜。冇錯係。「咁佢可能又驚佢主動提出援手你又畀說話佢聽呢」

32. 的確，「佢主動提出援手而我畀說話佢聽」，呢個機會都真係相當大。亦都講真，在我而家咁嘅情況下，當埃汾太返工或乜，問良心，我係咪真係想佢係側邊照顧我嗰個？應該都唔係。況且佢同我都難保證，可能又舊事重提，又嘈過。

33. 於是你睇到呢度應該鬧，屌，你真係港女（是的）。唔嚟照顧你你又唔高興，但如果真係嚟其實你又唔高興，咁你想點撚樣？

34. 我都問自己，咁我諗，係架，我會畀說話佢聽，畀我消消氣（所可能因為係咁，我發夢不停鬧佢，因為現實做唔到）（我諗起個朋友，臨移民去英國前，特登打個電話去鬧佢親戚一鑊，十分有型，我就未有咁勇）。係喎，畀我消消氣，咪算咯。咁之後，可能冇事啩。如果你用啲好東方嘅講法，我好似啲人死咗，仲有怨氣，投唔到胎咁。就係有舊嘢一路在心度。以我嚟講，都真係少見的。

35. 咁但，當然你可以話，我以上呢個要求，要人畀你消消氣唔還拖，太過份了吧，「況月你啲消消氣唔知畀幾多說話佢聽喎」。而講真的，撇除呢啲嘢，我係咪真係好想對住佢？可能都唔係，即使未反枱時，我同佢相處嘅時間，都稱不想係「愉快」，頂多係「我可以接受」

36. 咁點？即係，可能，佢send個message過嚟就得。見就真係唔使見了，正如我最初講，邊有得勉強？見面咪又嘈。

37. 我甚至真係有啲後悔，可能佢都有啲後悔，大家為咗呢個「一場母子」嘅鎖，口和心不和咁，每年（今年之前）過年，做冬，生日，一齊見。其實為咗乜？我固然頂多係「可接受」，我亦都唔覺得佢好enjoy，搞咁多為乜？只係為咗嗰個傳統嘅框架？

38. 對，你再睇落去前，應該睇到我有好多矛盾，咁但人就係矛盾的。歡迎你友善地筫疑，我有機會再諗深入啲。

＝＝＝＝＝＝＝

39. 好啦，寫咗咁多，都做到我原本想要嘅文學效果（！），就係《薄荷糖》或《我們都無法成為大人》咁，先畀你睇而家，然後再返返早少少，畀你睇下，點解主角會搞成咁，當中經歷咗乜？

40. 如果之前冇乜聽過，但又睇到呢度嘅，應該會問：到底你做過乜，或者你老母做過乜，搞到咁大仇口？

41. 答案，係真係冇喎。唔係你想像中嗰啲，我呃咗佢錢，或者佢毁咗我乜之類，冇喎。

42. 我一路思考，件事係由幾時開始真係去到失控嘅呢。答案係2020年12月（記住），然後2021年母親節（wow）就真係反咗枱。你話去到最近佢不聞不問呢個，只係錦上添花，趕多件出場，但對賽果已經冇乜影響的。

43. 事實上，母親節反枱後，佢同我都仲有send 過4個message，每人兩個。一個係7月，我生日，我正諗佢會唔會不聞不問（都話，我是港女），但佢有send生日快樂，「拿咁個壓力就去咗我度啦」（我是港女！），我唔應佢，咪變咗我衰咯，所以我有「多謝」。然後到9月尾，佢生日啦喎，又係個壓力去返我度（我是港女！），喂，咁我生日佢有send嘛，在一個對等嘅禮節上，我好似冇理由唔send，所以我都係send咗。佢就叻，回左句「多謝你仲記得有個老母」。我就真係唔撚明，點解啲人不能簡單咁覆一句多謝，硬係咁都要抽多一下水。

44. 你應該睇到呢度，會覺得，你兩條友真係一擔擔，好搞笑。

＝＝＝＝＝

45. 再回前少少，2020年12月，真係成件事失控嘅一個點，亦冇乜咩好大件事發生。但交代下，我就係當時去台灣搞居留證，嗰時仲有工返（在台北時畀人Zoom炒，幾開心），然後Patreon搞咗幾個月，有啲成績。最重要係，嗰個月開始收年費，反應好好，所以我有筆錢。

46. 而我係睇錢睇得重嘅（但我唔認為我市儈孤寒，我認為係同我追求安全感有關，有機會講多啲），但我都係好異常地，主動派錢，唔係好多，好似每人兩萬蚊，畀咗埃汾太啦，我老豆啦，我個妹啦，同我我老母。八皮嘢喎，你諗下我拎去日本可以做幾多嘢？

47. 咁埃汾太當然會多謝一句「熊熊真好」（原文照錄），我老豆當然都多謝我，但佢以為我移民唔返嚟，我話唔係。我個妹就有趣啲，忽然間好醒目，佢以為我想自殺，我話痴線。

48. 好啦，我老母，當然唔會有半句多謝，noted或者 well received都冇。咁但真係冇嘢的，當時我嘅期望已經知道佢係咁。咁然後，我去台灣，計埋兩邊隔離，都搞個幾月，我個妹就話食飯（記住呢句），於是我老母就同佢，同我，同埃汾太一齊食飯。

49. 呢餐飯就勁咯。真係由呢個位件事開始去到不能回頭。未即時反枱，但我嘅不滿由嗰個位開始，一路積上去，冇再減過。後來過年都見咗次，相安無事，但我嘅不滿冇減到，只係冇再加。卒之到母親節嗰鑊再加多啲，就反咗枱。

50. 但講返，2020车12月餐飯發生咩事呢？好簡單，嘢食都未叫，我老母一坐低，已經畀個餐牌我個妹，同佢講「叫嘢食啦，你阿哥而家好有錢呀」。咁我應該冇出講嘢，但可能「唧」咗一樣，同埋擺一個「又點撚樣呀仆街」嘅表情（你第時casting可以叫人示範下）。

51. 但應該在我未講任何嘢，我個妹亦未叫嘢之前，我老母已經繼續講，大意就係「拿，對付呢啲咁嘅人（指我，但冇指住我啦），我已經有方法，就係唔會留低錢畀佢」

52. 應該去到某個位，我就開始講咗句「喂你要畀說話我聽就唔好約出嚟食飯啦，好得閒呀？係咪搵交嗌？」

53. 你估佢點答？上面咪畀咗伏線你。佢真係話「我冇約喎，係你個妹約咋喎」。好嘢，真係好撚嘢（呢句我冇講）。打後呢，就冇口角，但我應該成餐飯都冇睬過佢，冇望過佢，之後一齊搭車都係咁。

54. 然後講咗啦，過年，還好。但你可以話到我畀說話佢聽，又係我個妹約，我話，拿你同佢講，「如果又要畀說話我聽就唔好見」。咁我個妹真係唔係傻的，佢話，嘩，佢會發癲架，你自己同佢講。咁作為一個男人（！），我就真係去問我老母。佢當時嘅反應，又惡劣喎，大約係話「到時唔講嘢咪唔會鬧交」（其實有原文，但我唔想再睇返），咁結果當晚，又冇乜事發生，大家風花雪月咁，咪好咯。我亦都借呢個情況幫自己向你地辯護返，係呀我問佢時都係畀說話佢聽，但佢冇嘢我咪唔會再搞搞震。

＝＝＝＝＝

55. 咁但，然後就係母親節反枱啦。諗真啲，我都真係有啲唔應該，似乎唔應該在咁嘅日子，咁但，想嘅咩。無論如何，嗰日在我個妹嘅未婚夫（我個妹離咗婚然後會再結婚，冇乜咁奇）屋企食飯，咁真係唔係太熟，唔方便發作。

56. 發生咩事？就係因為隻貓。下？係，就係一隻貓，英國短毛貓，in case anyone cares

57. 咩回事？好簡單，嗰時我老母又搞移民台灣（當年仲恥笑我添，挑），原本會同佢老公（唔係我老豆）過去住一排。咁但，佢隻貓點算？咁當然可以檢疫或乜，但佢隻貓好老，又多病，就不能再坐飛機又咁檢咁耐的，會死的（佢話，我冇唔信）。

58. 所以個方法係乜？就係送畀我，佢就拍拍籮柚。嘩，多撚謝喎。

59. 當然，我唔係大愛動物L，我懷疑有啲人會直頭鬧佢遺棄隻嘢（最後點收科我都唔知，都話冇聯絡），但唔係批判佢呢樣嘢。

60. 問題係乜？問題就係，我唔鍾意貓的，我對貓敏感（好多人知，有人見識過添），佢隻貓尤其麻煩。外表係可愛的，但老嘛，又要食藥或乜。餵佢食藥都幾係嘢，吐返出嚟不特止，有時古惑到縮入梳化底先吐出嚟。「你有咁有愛心？」，當然係埃汾太做啦

61. 冇錯，點解我地知？因為之前，我老母都係一年去幾次日本嘅人，都係掉低啲貓（仲有一隻，但嗰夎冇咁難搞，好似我個妹認咗頭）在我度。係喎，佢仲要覺得我玩得好開心呀，好似益咗我咁呀。

62. 你又可以質疑我做乜唔反抗（我覺得我好似啲風化案事主咁），咁但，我由頭到尾都唔鍾意貓，而佢當然係知我對貓敏感。佢話撚知我，算數。仲當係益咗我咁，你兩公婆又冇B，畀啲嘢你玩呀。好喎。

63. 但最重要嘅係，我都講過，我對貓敏感，咁但，佢之前掉隻貓，難道我會理嗎？我當然唔會，我會鎖自己入房，咁當然係埃汾太去負責搞佢啲貓。而佢都係唔鍾意貓的，況且埃汾太舊年開始返返工，忙嘛。仲要搞半個鐘餵雙貓食藥？

64. 咁你唔信都好，但真係唔係好關我事，我係唔會理的，但埃汾太會好慘。但佢唔係一個會同人開火嘅人。所以我作為一個男人，當然面對呢個比一齊掉落水救邊個更深嘅問題，就只能當面拒絶我老母，叫佢唔好，另外搵方法。

65. 但當然，佢係唔會理，「唔咩好丫」，「下星期我拎過嚟」（之類）。

66. 好啦，都話在我妹未婚夫匡企，我好似第二次見，唔方便在人地屋企嘈。但我食完餐飯，返到屋企，我就 send message，相當不客你地（唔想搵原文），大約係話好鄭重同佢講，叫佢唔好夾硬嚟，頭先已經講咗唔好。呢件事係唔會發生的。

67. 唔止，我仲加咗句：「仲有，澄清返，我由始到終都冇諗住拎你一個仙身家」，咁上下。你可以話我呢啲行為完全過火，冇必要，而且離晒題。但明顯就係積咗好耐嘅不滿爆晒出嚟了。

68. 然後佢點回，我都唔係好記得，都話唔想搵嚟睇。但我幾肯定有一句：「記得上網寫文數你個仆街老母」，最後四個字肯定原文照錄。不過，呢篇文就真係唔係嗰個purpose

=============

69. 然後，再數遠啲？2020年12月去台灣食飯前，係點？都有啲燶味。講你都唔信，居然呢個社運有啲關係。而我相信（我估咋下），亦同我老母剛退休有關係。得閒得滯。亦都可能因為更年期。

70. 呢度介紹返，我老母好後生生我，佢1959年出世（有乜秘密？），所以佢2019年先退休，正係嗰期啲事情開始變差。我覺得有關，雖然完全主觀。

71. 佢不停咁發表佢嘅各式偉論（咁放心，佢未同我講希拉莉係蜥蜴人嘅），我都仲可以容忍，雖然偶然會反駁，但都仲未失晒控。

72. 我比較不能容忍，就係佢真係退休太得閒，開始迷上睇YouTube，嗰啲港元爆煲提爆中文濕鳩KOL

73. 本來，佢啲品味有幾低劣，都真係同我無關。問題係，我上佢度食飯，佢要播埋嚟一齊睇嘛。我就真係相當難忍受。

74. 甚至去到一個位，佢叫我「學下人」，陰功，我要學嗰啲咁嘅濕鳩。我真係好似教父咁諗，老母呀老母，我做錯過啲乜？你要咁唔尊重我？我細個，我老母並唔係嗰啲會「你學下人地邊個邊個啦」嗰啲港媽（咁當然，亦因為我嘅成績十分好），居然而家係咁。

— — — — — — — —

75. 結果篇文都係有啲失控地長，再講之前，就有啲太悶了。我諗以上嘅例子，你會知道近年我地發生咩事。

76. 但你會問，咁你細個嗰時呢？

77. 我諗，我從來冇覺得好溫暖或乜，但講真，呢個唔係佢嘅錯。況且，以前我同佢嘅情況肯定冇咁惡劣，甚至係我中學時，我大學時，都冇咁惡劣。雖然我從來都唔係咩好親近佢，但同而家比，實在兩個世界。

78. 我嘅童年，應該係算OK愉快嘅。我老母當然有打我（嗰個年代），但從冇咩虐待我呀，令我有咩陰影咁。雖然我老豆錢都冇畀，物質就肯定唔係點豐富，但亦冇乜咩點樣好辛苦咁捱過。我唔會覺得佢係一個好好嘅老母，但，亦唔係相當差。可能1分最好，10分最差，佢係6.5分咁（當年甚至應該未去到7分）？況且，佢有佢嘅難處

79. 我初中可能冇童年咁愉快，但亦唔係屋企嘅問題。固然，我老豆老母離婚，係一個問題，但唔係造成咗我好大嘅陰影。咁而當年，呢個雖然仲係一種stigma（到我教書時，一班往往十件八件學生單親家庭，閒過立秋），但亦因為佢地離婚時我都中學，咁你中學生已經唔太會去取笑人地老豆走佬之類咁無聊。

80. 況且，離婚呢樣嘢，唔係佢想嘛，佢再惡頂都好，都係我老豆要負上全部責任，咁係我老豆有外遇然後拋妻棄子嘛，仲冇畀錢添。咁我老母當然係個受害者。我仲記得有一鑊，學校唔知填啲津貼定乜，好鬼TVB，阿媽好似串DIVORCED填錯咗，份嘢畀班主任打回頭，阿媽在喊。嗯。我係記得的。

81. 當年未必咁懂事，咁但你想像到，我老母咁早奉子成婚（正係我），讀到好似中五就生仔，然後離婚，帶住兩件細嘅（正式離係中學，但老豆之前已走啦），講真，好不容易的，最大問題仲要佢冇錢嘛，我老豆又冇畀錢。咁我老母要返工，又要整住兩件小朋友，真不容易。好彩嗰時似乎啲人唔多理咩獨留兒童在家。

82. 以上種種，全部明白。我亦冇可能「怪」佢冇好關心我，或者好多時間陪我。畢竟離婚呢樣嘢，唔係佢選擇，佢係受害者。

83. 咁但，係有個譜架嘛。我知佢係受害者，佢亦唔係不停咁在我或在其他人面前play the victim，呢啲唔係佢作風。但我想講，呢個真係不代表打後十幾廿年我都應該容忍佢所有嘢，對不？

84. 仲有一個講法，唔止一個人提，可能我老母話荒謬，我亦無法證實，但我係有啲信的。我老母，係將佢不愉快嘅婚因（雖然唔係佢嘅錯），同埋對我老豆嘅不滿，投射咗落我身上。係完全唔關事的，我同我老母完全唔似（除咗都鹹濕），但，就係咁投射，見到我就諗起個衰人。

85. 我唔知佢嘅呢段婚姻對佢有幾大傷害，有幾大陰影。但有人話，我嘅存在，就係不停咁提醒佢呢件事。而佢有親口提過嘅，就係佢堅持佢係因為有咗我，先只能讀到中五云云。疑點利益可以歸於佢，但我想講，其實我真係無辜的。

86. 我老豆當年實在太靚仔又好，咩都好，總之，我好似冇聽過有人話佢係強嚟的。咁，我老母就有咗我。可能真係當年一個唔好嘅決定，搞到成個人生都唔同咗。My condolence，但，冤有頭債有主呀施主。

87. 當然，呢啲只係外人嘅猜測，但因為唔止一個人咁講，我就紀錄低。可能根本唔關事，我甚至有理由相信，我老母對我嘅憎恨，早已超超過對我老豆。畢竟佢地離婚都超過三十年。

＝＝＝＝＝＝＝＝＝

88. 我主觀地認為，我老母係一個蠻不講理，完全不可理喻，諸多挑剔，脾氣又差嘅人。呢個唔係今日嘅感受，係細細個已經咁覺得，咁但，呢啲嘢，並唔會令到我咁大仇口嘅。正如佢一樣可以數我好多缺點，佢亦都好樂意在我面前數，甚至在其他人面前數落我。

89. 講一件事，應該係呢兩三年嘅，新年去佢度啦，咁上完佢屋企，出去食飯啦，多人嘛，佢又住高層，就質滿人啦，咁下面嗰啲人就往往一入嚟就超重咁啦。但佢就會同啲人講，就係我呢個肥仔嘅問題。唔止，係一程三十幾樓落去嘅電梯，佢可以（同唔同嘅人）攻擊咗我三次，連射功能好強。我並冇十分嬲，但真係覺得佢係不放過任何一個機會，或者對佢嚟講已經好似呼吸咁自然。

90. 我記得我唔止一次寫過，佢係從不認同我嘅任何嘢，真係好似一次都冇。我細個讀書幾叻都好，永無讚半句，反而有得鬧。不過又唔係「6A2B咁撚廢 點解唔係8A」嗰啲，而係佢可以搵到其他唔關事嘢嚟鬧。呢個可能係佢嘅性格，甚至已經成為一種習慣，到而家都係，正如佢唔覺得我出本書有乜撚嘢咁巴閉，我開個Patreon有乜撚嘢咁巴閉，我寫文有人睇有乜撚嘢叻。

91. 咁但，你話呢個係我嘅陰影呢？都應該唔係。講真，「到我升職加人工同女爆房房慶祝時」，你估我仲care唔care佢認唔認同？正是如此，大個咗，你會有其他人認同你。

92. 不過細個，冇乜其他人，又冇女朋友，我個妹又內向，唔會當我係咩role model（幸好冇），同性朋友又唔會認同我呢啲嘢（你打波好叻就有人認同你），咁老師，總不能太過偏心，而且咁多學生，況且我可能成績好，但唔係一個乖嘅學生。

93. 咁所以，要佢嘅認同時，就係冇嘅。當時我覺得有啲嘢，但多年後真係已經冇嘢，同後來嘅事已冇乜關。但放心，要佢認同時，冇。下半句，唔係「到佢認同時我已經唔需要」，冇喎，佢一直都冇，相當consistent

94. 頭先講，話佢差不多從冇認同過我。有唯一一次例外，我初做分析員不久，出咗大舊花紅，我就團年飯時質咗幾皮嘢畀佢，當然係當住咁多親友面前（當時我已經送過唔少次花畀女仔，當然明白個心態），仲係畀現錢，佢就好似之後在啲親友面前讚過我一兩句啦。

— — — — —

95. 係喎，講到尾，就係錢。我覺得應該唔係，但旁人睇，相當可能覺得，我同佢係因財失義（？）嘅。雖然我覺得好似唔係，金錢只係表面，但可能真係我原來似佢，係金錢背後象徵嘅安全感。

96. 回帶，你見佢，話對付我，制裁我嘅終極武器係乜？就係一個仙都唔留畀我嘛。呢類威脅，之前都用咗幾次。卒之去到一個位，我連呢樣都唔驚。

97. 唔係我嫌錢腥，亦真係每個人都有個價，但真係夠了。去到呢個位，我就不能再容忍了。

98. 潛台詞，大家都知，因為後來我都搵到錢。係好難聽，但你可以諗下，有幾多咩父慈子孝，都係因為呢啲嘢維護住？Freakonomics話齋，未立遺囑嘅老人家，在老人院，仔女探訪嘅取數，係立咗遺囑嗰啲嘅十倍！（OK ,我亂作的）

99. 當然一個講法，可以話我有毛有翼啦，反面不認人啦。但我係唔同意。你話我梗係唔同意，但我會咁講：錢其實唔係真係咁改變一個人，只係，佢地顯露返真正嘅本性，唔再演其他嘢。你可以話只係文字遊戲。但，我同我老豆嘅關係，咁多年都乜點變到，並冇因為我搵到錢而有乜唔同咗。

100. 但，好仔不論爺田地，我老豆已經早我一步，實現咗我做二世祖嘅夢想，佢自己就冇乜錢，唔使討論。咁但，我連買樓，都冇拎過我老母一個仙。一個仙都冇。仲有，層樓係佢定佢老公賣畀我的，係，當然收足，沒有電視框，仲要係創屋苑新高價添。而佢仲講到好似益咗我咁呀，因為之後仲有升。很好的邏輯。

101. 早排朋友喪父，自己話係不孝子啦，講返自己同屋企關係都好差啦，好疏離啦，但至少家用係比足的。我話，拿，咁咪孝順咯。

102. 相反，我係一個畀唔足家用嘅人。更惡劣係，開頭都仲足，後來就開始唔多足，再後來就冇埋。我有理由相信，呢個係我老母相當不滿嘅原因之一，佢亦都開口講過多次。

103. 但你問我，我並不覺得有乜嘢係必然。你可以鬧我，但，佢好聲好氣都算，你畀說話我聽，鬧我，食一次飯講一次，公開數落我嘅。咁我更加唔畀。你可話我人無恥則無敵，但事實亦都係我有畀時，佢都已經係咁X架啦。咁我不如慳返啦，又可以點呢？咪再鬧多我幾嘢咯，但我拎返舊錢去買QQQ唔好？去多次日本唔好？為甚麼我要一路畀仲要一路畀人鬧呢？

104. 所以，我唔覺得有咩係必然的。順手講，有冇人中途已經爆咗句「點講都好都係佢生你出嚟」「佢都養咗你咁多年」，我係真係不能接受呢啲講法嘅。唔使提升到咩情緒勒索，但，我就係唔明個邏輯在邊。咁人對我好，我咪對佢好咯。人對我唔好嘅，點解我要因為乜乜乜對佢好？而呢個判斷，應該係受者決定嘛，你對女神好好，佢完全冇感覺，咁佢都唔會對你好架喎。

105. 而你話我自己假設都好，我始終唔係好覺得，我畀足家用嘅，今日我同佢就會好warm咁，我懷疑結局都係一樣。當然你可以話只係我百份百嘅假設，但，在我有畀足家用嘅幾年，我真係亦唔覺得啲關係有點好過（咁當然，好過而家嘅）。

＝＝＝＝

106. 呀，仲有一件事。如果要我自省，我覺得，我真係做錯咗嘅，係呢件事。雖然佢冇乜提，我相信佢唔覺得係一回事，但我真係覺得自己做錯。

107. 就係，我同埃汾太去咗澳洲結婚。

108. 但，做乜我地去咗澳洲結婚？冇喎，過癮咯，旅行結婚，唔使煩。仲可以避開我老母，當時呢個未必係最主要原因，但我好似有咁諗過，甚至有咁講過，會唔會流咗去佢耳中，我就唔知啦。咁如果佢聽到，理應唔高興或者幾嬲。我當年真係唔係特登要激佢或乜，但真係年少輕狂，覺得好過癮。咁後來，到我妹結婚時，唔知做乜，咁都有安排返埃汾太斟個茶畀佢嘅。

109. 但，當然一如我嘅所有嘢，佢都係睇唔順眼，包括我老婆，佢都係睇唔順眼的。記唔記得我講過，當年我知道隻眼有事，咁我同我老母關係仲係未極惡劣，佢都有叫我生個B，去照顧我。因為佢話自己都年紀大啦，潛台詞（我唔記得佢有冇講出口），即係，唔通旨意你老婆咩。但結果而家，我靠邊個？我唔靠我老婆，靠邊個呢？

— — — —

110. 寫到埋尾，破埋上次紀錄。可以肯定嘅係，我並不能好造作懶型咁話，我完全唔care．不錯，愛的反面唔係恨，係漠不關心，但我明顯未去到嗰個階段。否則我唔會打呢篇文啦，係咪？不過，我唔會強求，但我希望，慢慢向嗰個方向走，咁就大家都好。當然啦，我無數次嘅夢應該話畀我知，可能鬧佢一鑊勁嘅，我個心結先解得開。但撇除佢會唔會咁順攤呢個問題外，到時，會唔會我又已經唔知再講乜好？不過反而呢，好似佢對我就可以做到漠不關心啦，「又唔夠佢玩」。但，呢排文即使你覺得係attention seeking，都唔係想引佢嘅attention．

111. 真的，我甚至覺得，可能早早唔好往來，就對大家仲好。反正都係一樣嘅結局，而家結果唔多唔少係傷害咗大家更多，亦浪費咗更多嘅時間。講真，我真係相當厭倦嗰啲過年做冬嘅馬騮戲。你話開心都話，既然唔係太開心嘅，為乜？亦因為近年我更加不能容忍啲人浪費我時間，我永遠都係會諗：點解我唔將啲時間寫兩篇文？對讀者，對我，建設性都大好多。唔係話斤斤計較到咁，但真係，唔開心，做乜要勉強自己？最重要係，我亦唔覺得佢好開心。我唔相信舊年做冬或今年過年，冇咗我，佢會覺得唔開心。

112. 亦都半舊事重提，正係因為咁，所以你見話埃汾太拎唔到假嘅日子啦，我就要搵其他人啦，可能係我個妹，可能係其他人。我老母去咗邊？呢篇文就解答咗你。「佢常在我心１」

113. 可能，有些少遺憾啦，搞到咁。咁但，亦都真係冇乜方法，咪講過咯，點強求呢？Love and other impossible pursuit（咁重要嘅文揀相當有諗咗好耐），真係八字唔夾嘅，如何勉強？

114. 今次同上次篇萬字文有啲唔同，寫完成萬字，我都真係唔知表達咗乜。但，寫完，好似心入面舒服咗，咁可能已經達到最基本嘅目的。就希望之後唔好再發惡夢吧。我特別唔想在醫院發咁嘅夢。

=====

重出江湖！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，

富途嘅，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

============