Let’s Carpe some fucking Diem！
（按：呢篇文係1月29日，第一次開刀前寫，亦係我首次公開講病情。在meduim都留個紀錄，好似會流傳耐啲，其他人易啲搵得返。時序時，呢篇文之後，就係《論盡我阿媽》（第二次開刀前寫），然後係《入院記》（第二次開刀），同埋《三刀》（第三次開刀前寫）
===========================
［Let’s Carpe some fucking Diem！］抱歉年近歲晚破壞大家嘅心情，不過不能不寫，甚至不能拖多兩日出，信我。呢篇應該係作者區區在下我本人，自問近年寫得最好嘅文，因為沉澱咗好耐，諗咗兩個幾月，照計點都唔會十分非常之差。當然呢啲同讀者嘅評語可以完全無關。但好重要，重覆多次，唔係我一時衝動寫嘅文。Of note，呢篇文係我星期六朝早開始寫嘅，但未必寫得完。
受眼藥水影響，睇唔清，多錯字，畀啲想像力
（update : 定咗星期六晚八點開）
1. Every existing thing is born without reason, prolongs itself out of weakness, and dies by chance. — 沙特
TLDR 5 個
我個情況（醫學上）
Worst case：咁萬一，真係盲咗
唏盲咗唔一定要死啫，呀邊個邊個咪好地地
我會想做乜，有乜心願未了
唔好拖累人，唔好拖累埃汾太，佢要有佢嘅生活
你可以做啲乜？
TLDR 5 個
2. TLDR：生命嘅嘢，好似陽具咁，其他人總話唔介意長短，夠用就得，但當事 人永遠唔係好信服。可以肯定嘅係，太短肯定唔好，但太長而冇內容嘅，亦係嘥氣 — 呢段十分之林振強，但我同佢唔同，我嘅特點（優定缺？）係我有事會講，會同朋友講同讀者講，唔會自己收埋。所以我話OK就真係OK，而我唔OK就真係唔係幾OK。而家就唔係太OK
3. TLDR2：本人可能會盲，全盲，之後可能會死。咁we are all dying，我當然係講遠早於平均壽命而死。咁我相信，冇人唔知道咩叫「全盲」同埋「死」架可？邊隻字唔明？（但真係有人問我係咪即係睇唔到嘢）。當然，「可能」有幾「可能」就唔知，但至少足夠令我寫呢篇文。
4. TLDR3：而我其實並唔係太想寫呢篇文，但又有咁嘅必要，反正我向來都奉行最高透明度，亦都有唔少朋友知。咁即使我冇同你講，唔代表我唔當你係好朋友，只係你唔問起我又唔會主動講咁解，畢竟呢啲並唔係十分增進食慾或性慾嘅話題。大家日常受嘅壓力仲唔夠？
5. TLDR4：如果畀我有得揀，我就寧願揀例如我會聾咗啦，坐輪椅啦，咁都好似好啲。但邊到你「揀」，有得畀我揀我做吳彥祖添。事實係作為一個鍾意睇書，睇戲，睇波，睇女嘅人，我盲咗，仲有乜生趣？咁真係不如死咗去算啦。我並唔係好負面好晦氣咁講，而係一個我自覺好「理智」好「合理」嘅決定。
6. TLDR5：大家都會識講，生命不在乎長度，在乎係咪精彩，係咪無憾。我下面會講（唔止，「我下面」都會講，中文真偉大），但短答你：我覺得暫時我嘅人生，都相當精彩，死而無憾，不枉此生。好老套，都算感恩，上天待我還不錯。固然人總係貪心，但抽離啲睇，喂，今日最後審判，面對造物主，佢反問我「仆你個街我有冇待薄你？」，我都好難投訴乜？
我個情況（醫學上）
7. 最唔想寫呢部份，唔係我唔願意講，但會失焦。所以快講所有你需要知道嘅嘢，就唔使介紹神醫氣功周兆祥畀我了。
8. 實情好多好多朋友都知咗好耐，木人患嘅，係青光眼。即係乜？自己維基。用最淺白嘅語言，正常人眼球入面嘅水（唔係淚水），會排走。但有啲人好似塞咗渠咁，排唔走。咁有乜後果？就會眼壓高。眼壓高就會壓死啲神經線，慢慢睇唔到嘢，而因為完全唔痛，慢性過程，所以往往唔覺。至於點解有咁嘅現象？答案都係唔知。當然你可以話我多行不義有報應，都係narrative啫。
9. 我發現呢個問題，係2017年嘅事，當時睇醫生，咁但右眼已經完全睇唔到嘢（我再講一次，有冇人唔明咩叫完全睇唔到嘢？）。咁但左眼仲睇到嘢，所以定期覆診，滴住眼藥水咁，所以有好多人發現我對眼係好紅嘅。
10. 之後幾年，一路都冇乜好大問題。但去到2021年，7月覆診好地地，然後我唔知做乜遲咗覆診，好似11月尾先去（平時多數3個月），咁個情況忽然變得相當差。醫生轉咗藥水，效果冇乜，做咗次激光（類似你矯視，但完全唔同嘅嘢，唔使入醫院），眼壓降咗一陣，但依然不太理想。
11. 然後醫生當然叫我開刀，然後我又再搞得兩搞，又睇埋另一個醫生（因為原本個醫生我一路都唔多鍾意，咁你可以質疑我又唔係MBBS憑乜判斷醫生好唔好？的確係。咁但總之冇咗個信任，我唔feel good，就講乜都假。況且我唔係轉咗搵氣功師，我都係搵另一個眼科專科啫）
12. 另一個醫生，星期五睇完，都係建議我開刀。咁但情況有啲複雜，「因為就快農曆年」，call me 搞笑但我一路寫文話唔好大時大節前開刀嘛。另外，呀醫生亦都放到年初十。咁所以佢直頭話可以今日（星期六）開，咁然後佢星期日同星期一可以觀察我情況。因為佢就唔想話搞到星期一開，然後初十先睇我情況，就太唔安全。
13. 當然仲有個選擇係，我年初十先開刀。咁但，又要睇醫生判斷（我今日再去睇佢），例如我嘅情況會唔會呢十日差好多啦。仲有，而家佢開咗口服藥畀我（以前一直只係滴眼藥水），咁當然係有一定副作用，咁佢又要睇我覺得可唔可以頂十日（但暫時我覺得啲副作用不大，小事）之類。所以一切仲係未知
14. 如果係開刀嘅，咪開刀。可以選擇唔住院，唔住院就唔全身麻醉。咁我當然唔住院，一來平啲，二來唔鍾意醫院嘅氛圍，三來亦都唔想全身麻醉，多個風險。理論上手術一兩粒鐘，完事後埃汾太就接我返屋企（因為我左眼會包住鈔布，而右眼一早失明，咁我不可能自己返屋企的）
15. 手術嘅嘢，就應該係幫我插條管，排水。但當然，手術有風險了，有機會手術失敗，會直頭睇唔到嘢。恭喜。咁我知好TVB，但我都係有問醫生，個風險有幾大，醫生就話可能1%咁，咁當然都係會照做
16. 但當然，手術成功，亦不等於從此解決所有問題。你知啦，人體嘅嘢。所以either way，我都要準備定我有可能會變盲。
17. 當然最壞嘅情況，就係我手術唔掂，即時盲埋，恭喜。咁呢篇就可能係我睇到嘢時最後嘅文。最好嘅情況？手術OK，我照舊也文也武，之後眼鏡都唔使戴（冇錯，會做埋近視，因為做埋白內障，有些小）
18. 可能有人覺得我鑽牛角尖，杞人憂天，但我一向係個悲觀嘅樂觀者，諗定最壞情況者。況且，唔寫可能真係冇機會寫。而即使手術成功，亦不代表我之後唔會慢慢失明。所以可能寫定都係有用。加上呢篇文已經在我心中好幾個月，點都係要寫，明冇？
Worst case：咁萬一，真係盲咗
19. 如果我真係盲咗，好簡單，我會自殺。有邊隻字你唔明？
20. 當然唔係即刻，可能仲有些少嘢我想做（陣間會講），再加上，我剛另外買咗保險，大家知道不能太早自殺。當然佢仲未正式承保，見我有呢個病當然會會加重保費，但即係只要我兩三年自殺，都係食硬佢，呢個係唯一一個你戰勝保險公司嘅方法。亦有可能佢根本唔受我，但機會應不大，反正保險公司都係大數定律，而事實真係買完一年後自殺嘅人，極少，精算師幫你計晒。
21. 有一期我係一個多愁善感嘅文青，主要係讀書嗰時，中學特別係，成日想死。但大學時開始改變，我講過點解，因為我接觸到兩樣嘢：互聯網，同埋性交。世界居然有咁好玩嘅東西，有時仲係免費，Life is good，生命生命這好傢伙。
22. 到我出嚟做嘢後，雖然都偶有起跌，但都係順嘅多，逆嘅少。因為最困乏嘅年代，我都仲有互聯網，同埋性交，甚至係互聯網帶畀我性交，真好。到工作順利嘅日子，更加簡單。出大大嘅花紅，食好嘅餐廳，上漂亮嘅女，住靚嘅酒店。OK你話膚淺世俗，豬的快樂，咁我又話你知，我睇過好好睇嘅電影，好精彩嘅書，去過古巴去過緬甸去過科索沃，出過書，影響咗唔少人，現場睇過慕遜加柏踢歐聯，去過慕尼黑啤酒節 — 其實於我嚟講，同美食性交都係差不多嘅嘢，narrative啫。
23. 但講返，正如文首我引沙特嗰句：生命嘅嘢，無厘頭咁就開始咗，從來冇人拎你嘅同意（呢個係千古哲學問題）。然後，其實你係因為你嘅怯懦，然後延長佢（當然我地發明好多其他嘢去掩蓋呢件事嘅本質）。最後？不明不白咁就死咗。甚麼都沒有了。
24. 同樣係存在主義嘅，卡繆就講：世上只有一個嚴肅嘅哲學問題，就係自殺。
25. 我嘅理解，好簡單，拍埋沙特嗰句一齊睇。任何埋怨或投訴生命嘅人，都唔去冲面對一樣嘢：生存，亦係一種選擇。你冇得決定你出世，但一般嚟講，除非你畀人囚禁，或者大病，否則你可以決定隨時終止你生命。但好多人冇去咁做，點解？可能係怕痛楚。但你都死咯，痛楚係乜？況且，點解你care呢個個體嘅痛楚？正如沙特所言，呢種係軟弱
26. 而細細個識我嘅朋友可以做證，唔係因為我而家係「既得利益者」我先講呢啲，細細個我已經係講沙特卡繆，正如咁多年，我都係pro — choice（唔知係咪咁叫），人應該有終結自己生命嘅權利，大家應該尊重，甚至讚揚。我當然亦係pro 安樂死，甚庄係主動安樂死，甚至係協助自殺。當然我明白當中有好多道德倫理問題，但不在本文討論。
27. 我再四強調，我寫呢篇文時，心情相當平靜，甚至有少少興奮，唔係一路寫一路喊或好沉重咁，因為我真係深思熟慮。所以我希望你代入我嘅心路歷程，理解我點解咁諗。
28. 至少呢一刻，我並唔係認為生命一團糟，世界很黑暗。我覺得生命好美好，即係，「至少我嘅生命好美好」。正如我講，你用各種指標，我都可以話係「勝利紅」。你講世俗嘅嘢我有，未必好多，唔係頂尖（「Elon Musk先叫有錢」），但即係，好過多數人，甚至絶大多數人（當然七成，九成，定九成九先叫絶大多數就隨你）
29. 你講世俗嘅，我生活無憂，唔係今次呢壇嘢，照計搵多幾年錢我就「上岸」，「財務自由」。我家有賢妻，樓又早買咗，又隨時可以移民走，之前女伴又不少。
30. 你講冇咁世俗嘅，我睇過好多好嘅書，好嘅戲，食過好嘅餐廳。更重要係我建立到套口味。然後，我自己寫過文，出過書，影響過唔少人，仲有真心嘅fans
31. 再高層次啲嘅，我而家嘅收入，嚟自我鍾意做嘅嘢，有人畀錢我去做。我唔使睇人面色，仲有好嘅朋友，又有埃汾太。What can I say？
32. 即係，就算我聽日就死咗，呢啲「嘢」（「成就」），唔係可以入偉人傳記，但都係好多人兩世都做唔到，對不？咁所以，點會唔係死而無憾？至少我係
33. 冇錯，好世俗咁講，就係「收成期」，呀邊個呢個字真係用得好。雖然不停畀人屌，但我真係要講，你感受唔到咩係「收成期」，因為你未去到咯。
34. 但，「無無奈風雨偏要驟來，叫你失信心」。一般都係咁，去到呢個位，嘩，爽呀，開始想「享福」時，就有其他嘢打埋嚟了。
35. 就係《浮士德》咁，呢下太好太好啦，我想停留多陣，魔鬼就出現了，
36. 亦即係錢鍾書講，「快樂在人生裏，好比引誘小孩子吃藥的方糖，更像跑狗場裏引誘狗賽跑的電兔子。幾分鐘或者幾天的快樂賺我們活了一世，忍受著許多痛苦。我們希望它來，希望它留，希望它再來 — — 這三句話概括了整個人類努力的歷史」（佢呢篇文真係神作）
37. 我撫心自問，係咪真係無憾？yes and no．
38. 好廣義咁講，勞碌咗四十幾年，都冇乜點樣真係「hea」過。好記得瑞信陶冬嗰時寫，如果有一日脫離呢行，梗係即係掉Q走公司個電話，然後瞓佢老味七日七夜。
39. 嗰時呢段話深深打動我。然後2014年我被炒，原本以為「抖下」，都冇乜點抖，又再出山。打後到2018年我在星展裸辭又好，甚至舊年3月又被炒，到而家差不多一年，都好似冇乜真係「休息」過。營營役役，Benz for the mouth，為乜？搞咗個人Facebook Page同Patreon，就係無底深潭。永遠都覺得，喂，不如寫多篇文，呃多幾十個收視，可能多一個訂戶呢，一個就12蚊 一年就144蚊美金啦喎，「夠食碟牛肉」
40. 對，我原本以為係可以撈多幾年Patreon，然後「休息」下，搬去台灣日日做文青又好，環遊世界又好。但結果又係唔係咁簡單。十分電影地，你見啲江湖大佬，個個都係「做埋呢筆收山」，就會出事。
41. 又或者，仲有更多地方我想去，仲有更多好嘅餐廳我想食，仲有更多書，有更多戲我想睇。你知道，係永無止境的。呢種就係人無盡嘅慾望，等於皇帝同富豪追求永生咁。對，「爽」嘅人，咪會想玩耐啲，證明我嘅人生都幾爽。你嘅人生好痛苦嘅，雖然你未必有勇氣終結佢，但嗰一日嚟到，可能你都覺得鬆一口氣。
42. 但你睇各種科幻設定都知，永生係詛咒，生命之所以有意義，就係因為會死。不會重來，亦不必重來。唔用以上嗰啲「仲有好多地方未去」嘅講法，咁，我短短嘅43年貨仔（應該擺到46，陣間解），已經做咗好多人幾世嘅嘢，呢個係最重要
唏盲咗唔一定要死啫，呀邊個邊個咪好地地
43. 我知道，好多盲人甚至可以自己照顧自己，我覺得好amazing，真心佩服。而我甚至仲有埃汾太，佢會辭咗份工全職照顧我，而我亦畀好多人財政上好。客觀條件好好多。
44. 問題係，我係咪要學嗰啲人？What For？Whats’s the point？
45. 對於一個鍾意睇書，寫嘢，睇戲，睇波，睇女，去旅行嘅人。睇唔到嘅嘢生活，仲有乜意嘢？點解要去延長佢？
46. 特別係，我唔係先天失明嘅人。我有過精彩過嘅時間，點去接受黑暗？點解我要去接受？仲有乜意義？
47. 正如我講，畀我有得揀，我寧願坐輪椅，聾啞，加埋性無能。但邊到你揀？
48. 我知，有盲人突字，有讀屏，實情我都試過合埋眼打字，相信寫文唔會好難，但你明知係唔同嘅嘢，我連食齋燒鵝都唔制，你叫我睇突字？即係叫我第時聽陳公同德能講波畀盲人聽？佢兩位高當情操，但我不能接受我係受眾咯
49. 當然，我相信可能真係盲咗，我又可能搵到自己嘅生存意義。螻蟻尚且偷生，真係唔好低估人求生嘅意志，或者唔肯自殺嘅怯懦，但以上係我呢刻嘅想法。第時有新想法，再話你知。
我會想做乜，有乜心願未了
50. 主動定被動，突然或慢慢，人死前，總會諗有乜心願未了，有乜放唔低。你會想點走，我可能都有，但唔係好多
51. 正如我講，我唔係收收埋埋嘅人，以上嘅所有嘢，我一早有同埃汾太講，亦有同我好嘅朋友講。很好地佢地嘅反應都幾正面。唔係只係畀啲廉價嘅關心我，反而係諗下點幫我實現啲遺願，或者甚至係，講下由同我傾計，點樣又令佢地反思自己嘅人生。
52. 係啦，我要嘅就係呢樣嘢。一個人死兩次，第一次入土為安，第二次係最後一次有人談論你。
53. 之前講嘅好多「成就」，雖然爽，但都係人死如燈滅，我釘蓋後，乜都冇。冇錯啦，去到某個位，當然追求Legacy．雖然找唔覺得有乜咁高尚，都係人怕被人遺忘。虛榮之嘛。
54. 我冇小朋友，亦不打算生。你可以話了無牽掛，但又可以話少左個活下去嘅理由，任你點講。話時話，早幾年未同我老母反面，佢其實有叫我生個B，話生嚟照顧我，講到佢都一把年紀，又不能旨意我老婆（你睇女人幾惡毒，而我心諗，難道就旨意你）。但我覺得成件事好不道德。佢就好奇怪我做乜忽然道德撚上身。但我覺得咁樣生個小朋友出嚟，件事好撚錯。後來我睇《媽媽的神奇小子》，講蘇樺偉老母，特登生多個，就係為咗自己走咗有人照顧蘇樺偉。你大約想像到個細仔有乜感受。
55. 但話說回頭，雖然我同我老母反咗枱，但我並冇咩「怪佢帶我嚟呢個世界受苦」，咁當然因為我嘅生命過得都幾爽。而點講都好，都有一定程度係因為天資，咁亦都係基因，咁佢都有一定貢獻。
56. 我會搞「馬蘭頭獎學金」，當然我死咗都可以繼續，但我不可能放低舊錢畀學校啲友。所以已經搵咗我朋友，到時去搵可以繼承我思想嘅人。
57. 我係想去影響更多人。所以我會想再寫書，甚至想去再講talk，但我唔係想做莊陳有，我冇佢咁偉大。我亦唔係做杏林子（？）．唔係生命鬥士，唔係正能量。
58. 我絶對唔介意寫我嘅心路，我甚至願意去爭取「安樂死」，「協助自殺」，whatever you name it．但你諗起邊個？斌仔，
59. 嗰時我都有睇《我要安樂死》，都引起社會不少討論。但然後呢？第一本書好，但再出仲有冇人理？冇辦法的，慢慢地大家就覺得佢係一個attention seeking嘅煩膠，即使佢唔係。
60. 我欣賞嘅係邊個？Eugene O’Kelly。怇寫咗本書，《Chasing Day Light》。臨死前寫的。知唔知最偉大係乜？首先，佢生臘瘤，幾個月命，實情四個月就死撚埋，所以本書好短，其實未寫完就死咗，最後老婆埋尾。唔會死唔斷氣出幾十本。另外，佢係KPMG嘅CEO，人生勝利組，原本升到上頂位，就傳嚟呢個消息。如果佢只係一個普通人，呢本書唔會咁多人講。
61. 見到冇？真係冇公平的。
62. 然後我又諗起一套法國片，都唔少人講，真係好睇，《閃亮人生》（The Intouchables），講個坐輪椅嘅白人，同照顧佢嘅黑人嘅情詛。齊齊玩滑翔傘，飛車，溝女，學藝術，聽音樂。但知唔知成件事重點係乜？重點係個白人好撚好撚有錢嘛！否則邊有戲唱！
63. 所以，原諒我就係咁，但我都係覺得，我嘅故事，係值得得講嘅。
唔好拖累人，唔好拖累埃汾太，佢要有佢嘅生活
64. 一般我唔係嗰啲好介意滾搞人嘅人，而我有問題都會出聲叫人幫。但都係要講，我認真選擇了結我生命，就真係唔想拖累咁多人。
65. OK，最主要係埃汾太，我合法妻子。我爸爸年紀都唔細，冇可能照顧返我轉頭。我老母情況同上，加上反咗枱，我甚至都唔係好想見到佢（OK，盲咗「見」唔到，但你明我意思），我兩個妹同我唔係極之親近，亦坦白講句我對佢地並唔係特別好，冇理由要求佢地對我好。
66. 我唔知鬼佬有冇類似講法，應該有，但，「久病床前無孝子」，非常之咁有智慧。＼
67. 我相信我嘅讀者，三十四歲，點都經歷過生離死別，好可能阿爺阿麻阿婆阿公嗰啲已不在，甚至父母都有可能不在，更不幸嘅可能經歷過朋友，戀人，仔女離世。
68. 但我相信，長痛不如短痛，親友離開固然難受，但更難受係長期臥病在床嘅折磨。病人不好受，身邊人亦唔好受。為乜？靈堂我見過有人談笑風生，有時亦真係對死者或生者嘅解脫，但在醫院，永遠係一片慘西。
69. 唔知大家有冇照顧過長期病人，或者殘疾人士。我冇，但我見過其他人咁做，我只係見，已經覺得辛苦。我想像唔到自己去做，更加想像唔到我去做被照顧嗰個。
70. 我阿麻走得相當快，佢的福氣。阿婆好似耐啲，但唔親，況且亦唔係老母親生老母，老母同佢都冇阿公咁親。阿公好似都走得OK快，但因為老母親，我都算親，成日探，幾深刻。
71. 但講災難當然係我阿爺，都搞咗一輪，仲要有一期在家。日日見住。佢又好虛弱，唔虛弱就好大脾氣鬧人，主要鬧我阿麻，我阿麻又哭哭啼啼，咁成日家嘈屋閉咁。大家都唔想，冇人有錯，社會嘅錯，為乜呢？幸好佢都唔係真係擺咗好耐。
72. 好啦，你諗下我個case，我盲咗，咁點？好簡單，埃汾太辭咗份工啦，全職照顧我。咁佢冇收入架啦喎。然後我都應該唔會有收入啦，真係日日錄斷音講感想咩，唔會有人再支持Patreon啦。咁即係齊齊食我嘅儲蓄啦。可能我地搬去台灣啦，生活指數平啲，況且好似對殘疾人友善啲
73. 咁，零收入，我副身家，兩個人食，在台灣，照計慳慳地，還可以啦。唔會咩好大壓力，但肯定唔係餐餐江振誠啦。
74. 之但係，又係嗰句，what for？whats the point？
75. 為何要延長一個，我本人都唔覺得特別有意思嘅生命呢？當然，可能到時我搵到新嘅意義，咁就最好啦。但如果冇呢？
76. 仲有，有冇諗過埃汾太嘅感受？
77. 之前寫王力宏，我都寫過，基本兩個人嘅嘢，就真係點離奇都有，只有佢兩個可以講，旁人係冇乜資格去判斷嘅。我對埃汾太好唔好呢啲，留返畀佢判斷啦。
78. 之但係，可以畀啲客觀啲嘅嘢大家睇到。好明顯地我係一個大男人，雖然唔打女人（從來都冇，一個都冇），但我係要傳統嗰種「男主外女主內」，雖然埃汾太有斷時間有返工，而家都有，但好長時間，佢都係打理晒屋企嘅各樣嘢，照顧晒我嘅起居飲食，等我可以專心工作，或者創作。
79. 唔止，你諗起，我最初話搞移民台灣，佢二話不說就辭咗份工過去，配合我嘅計劃。仲有，近年佢仲要容忍我越嚟越差嘅脾氣。點解越嚟越差？自從我開始有一邊眼盲咗，當然會影響我嘅性格。所以你見我近年寫文越嚟越有「力量」，亦都更加講錢。搵多幾個錢旁身呀。點知仲可以寫到幾耐？
80. 寫到呢度可能你又覺得佢好偉大，我條仆街唔知行乜運。咁但又要講下，喂，冇人迫佢嫁我啫。都係你情我願，你又不如諗下點解我娶佢。甚至佢冇開過口，我話結婚的。
81. 但可以肯定嘅係，為咗成就我，佢實情乜自己嘅生活，更加冇咩自己嘅夢想，亦唔係太多自己嘅社交圈子。好簡單，就係好傳統嘅相夫教子（雖然冇子），我好佢就開心，亦因為咁我娶佢。
82. 之但係，都總有個譜。佢最美好嘅十幾年，都畀咗我（今年結婚十周年，噢耶），咁，昆人都有個底線。我仲係咪好意思，要佢打後幾十年都照顧我？
83. 最仆街係，我唔係絶症嘛，只係盲咗，分分鐘擺多幾十年喎。咁佢打後幾十年嘅人生點？就係繼續照顧我？而我又唔係特別享受，what for，
84. 埃汾太仲後生，分分鐘仲可以改嫁，不過我冇偉大到叫佢咁做，因為我暫時想像唔到佢嫁咗第個人嘅畫面。
85. 但我肯定係，我死咗之後，我嘅遺產，加埋保險，夠佢衣食無憂食過世，追求自己想過嘅生活。
86. 但，就真係要早啲死，唔係一路坐食山崩。
你可以為我做啲乜？
88. 結果拖到差不多要開刀，都仲未寫完，唯有草草埋尾。因為我迷信，如果呢篇大埋唔到尾，我真係驚個手術會有問題。
89. OK，你可以做啲乜？
90. 首先，成個過程中，我發現原來要「死」都唔係咁易。因為我根本唔係咩絶症病人，好多可以「安樂死」嘅地方，都未必可以幫到我。咁當然我有睇過Dignitas之類，但仆你個街丫，一來收得貴。都算。但最仆街係，唔保證實成功喎，要評估先，而評估唔得，都唔會畀返錢你，我覺得幾搵笨。你有多啲資料可以話我知。當然你可以話，扯，你搵層樓跳咗佢咪得，但明顯沙特是對我，咁做嘅勇氣又要多好多，我都係想死得舒服啲。
91. 另外，真係付諸實行嘅，可能我想搞個「告別派對」之類。又係，諗到點搞話我知，硬係覺得好奇怪咁。我會諗，可能我釘咗後，在高流灣包返個場，等你地去食返餐咁。
92. 好啦，仲有，錢。真係乜都係錢。未訂我個Patreon嘅，記得訂。訂咗嘅，記得加碼。最好你去訂個40蚊美金年費，甚至100蚊美金年費，你當做定帛金又好，情緒勒索又好，咩都好。因為我篇文已經寫咗多次，咩都係錢。我盲咗，就咩收入都冇，埃汾太都係，咁就真係唔係幾好玩的。
93. 最後，作為朋友，你應該係share呢篇文吧。
或者，你可以搵我去講talk
94. 冇事嘅，就聽晚同大家報個平安。有事嘅，就同大家報個壞消息
＝＝＝＝＝＝＝＝＝＝＝＝＝＝＝＝＝＝
。Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85
折
