［Pride in your eyes～為我閃礫像最初］追兇二十年 — 香港樂壇集體撞邪事件（1983–2003）

TLDR：邊個第一個填錯呢個字？

1. 很多＊，我建議你可以睇晒正文先睇，唔使跳嚟跳去

2. 問題一個：譚詠麟嘅《霧之戀》（1983）（＊）《夏日寒風》（1984）（＊＊），張學友嘅《沉默的眼睛》（1987）（＊＊＊），容祖兒嘅《我的驕傲》（2003）（＊＊＊＊），四首歌有乜共通點？

3. OK，都係我熟嘅歌，都係我鍾意嘅歌。但風格唔同，年代唔同，唱片公司唔同，作曲人唔同，有原創歌有改編歌，填詞人都全部唔同（伏線嚟的）。

4. 由我篇文嘅題，己經故到。呢四首歌嘅歌詞，都有「閃礫」呢個詞。而呢個詞係不存在嘅，應該係香港人「發明」出嚟嘅一個…….錯詞。100%m made in Hong Kong．

5. 我大約做過下research（即係，Google），在國語歌，係搵唔到呢個詞嘅。字典，亦都冇呢個詞。呢個「閃礫」，好大可能係「閃爍」之誤，因為睇上文下理，歌詞都係指「閃爍」嘅意思，你見MV都寫「閃爍」，但你有時又會搵到「閃礫」。唔知睇錯定讀錯，「閃爍」撈埋「沙礫」「瓦礫」，就變咗「閃礫」。留意兩個字完全唔同音，「爍」係「削」，「礫」係「瀝」，照計冇任何爭議。

6. 呢個錯誤，好多人寫過。填詞人填錯詞，或歌手唱錯歌詞，亦唔係未試過。咁有乜特別？我就會畀個角度你。

7. 因為，成件事最痴線嘅，唔係有四個歌手唱錯 — 而係，我上面已經寫咗伏線 — 呢四首歌，係四個唔同嘅人填詞的！

8. 一個人撞邪讀錯搞錯唔出奇，四個人一齊撞邪，就真係四人歸西。冇錯，其中一個填詞人，己經歸咗西。

9. 我地可以由頭講起。「到底誰是始作俑者？」

＝＝＝＝＝

10. 先要講，好多時啲人批評歌手唱錯，我覺得冤枉，亦多Q餘。歌手唱錯，有乜咁大不了？要中文拎A先可以參加新秀？定要好似中大咁，要趴時呀何文匯嘅正音測試先可以出碟？

11. 另一個問題，有時啲帶同CD（新一代知唔知係乜？），送嘅歌詞，根木都係印錯嘅，甚至精選碟又變咗另一隻字，或者官方MV一隻字，演唱會MV又另一隻咁。

12. 不過，廣東話六個音調（唔計入聲），「痴咗線流馬尿」。於是有個好處：你好易知道，係唱嘅唱錯，定係填嘅填錯。好多時你用「正字」，發現唔啱音嘅，咪就係填詞人填錯。

13. 請哼一次：「或睡或現～閃礫不停」「閃礫暑天～的汗水」「望晚星～閃礫你的～眼睛」「為我閃礫～像最初」。全部都係「礫」先啱音，「爍」唔啱音。因為兩個字根本唔同音，「礫」係係第一聲，「爍」係第三聲（我指廣東話嘅九聲，唔係普通話國語）

14. 咁，就好明顯係填嘅人填錯啦！

＝＝＝

15. 而我真係要講句，文人就係相輕，華人更加明顯，中港台都保持呢種劣根性，唔使爭。我見好多人，批評完歌手，發現殺錯良民，就批評填詞人。例如話人「教壞細路」，「文盲都可以填詞」，「仲話才子喎」，「聽講中文拎A喎」。

16. 我認為，呢啲絶對係多Q餘，兼且反映自己嘅性格缺憾同埋失敗。

17. 人地填詞咋喎，幾時變咗文學權威？況且，教授學者一樣大錯特錯啦，有乜出奇。陳永明都解錯「沐猴而冠」 — 佢話係沖乾淨馬騮，當個「沐」字係沐浴，但其實「沐猴」個「沐」唔係動詞，「沐猴」係成個名詞，即係彌猴。點解我咁記得？因為就係古德明話佢。都鬧得啱喎，大佬，陳永明係中文系系主任喎，上電視主持《中文一分鐘》喎

18. 古德明仲有話黃子程解錯「罪不容誅」（唔係解「未大罪到要死」，而係解「死有餘辜，死咗抵償唔到你嘅罪惡」），中文系助理教授喎。

19. 不過，上面嗰啲係中文學者。另外，成語就真係冇得拗，有典故，照計冇得「習非成是」。但讀音就真係考起，N咁多人拗足幾十年，都真係冇乜結果，你引呢本典藉，佢引第二本。你話係呢個切呢個（切音嘛），佢話根本嗰時切嗰兩個字都唔係咁讀。點拗？除非你穿越返過去。況且「時間站在年輕人的一邊」，廢老最後都係死清光，得返啲「錯音」流傳。除非你有權力啦，讀錯嘅打靶，或者唔畀你畢業（冇錯，正係何文匯）。

20. 所以我認為，啲友去批評咩「才子都填錯」「文盲都可以填詞」「會考攞A喎」 — 係非常之咁 low嘅一件事，大家真係唔好做。唔只係顯得你個人low，越做得多更加會越 low — 因為你以為自己好撚醒，「我都叻過佢」，就永冇進步。

21. 「美斯都踩波車啦，球王喎，挑」「紐亞都屙蛋啦，鋼門喎，挑」「埃汾都讀錯青玉「案」啦，中文攞A喎，出書喎，挑。真係文盲都可以寫文」 — 即係，你要無限放大人地嘅錯誤，實得嘅。你爽就好。你大可以真係覺得「咁都唔入，畀我落去射都入啦」 — 可能都係真架！有啲門前失機，真係荼餐廳大肚腩阿叔落去都入 — 但其餘嗰89分半鐘人地做到嘅嘢，你0.11%都做唔到嘛。

22. 差不多任何事都好，太執著，太上綱上線，就必定變膠。拗任何嘢都係，交換下觀點就好，並不需要「說服」對方，反正亦不可能。而切忌上綱上線 — 因為上綱上線無限推演十分容易，你可以解釋好多嘢（嘩通脹啦加息啦經濟差啦美國佬要轉移視線啦第三次世界大戰啦） — 但個世界唔係咁運作的。

23. 例如點？你睇啲媒體Facebook Page留言，全部都係呢類垃圾，個個都「一葉知秋」「見微知著」，年青人嘅新聞呢，「拿啲新一代就係咁撚樣架啦」「第時香港一定玩完」。但不用分那麼細，後生嘅一樣，「拿啲廢老就係咁架啦」「就係佢地搞死咗香港呀」。總之任何事，唔關本人及同路人事，本人最聖潔。

24. 事實好多「錯音」「錯字」，都真係不能「習非成是」（「重蹈覆轍」就擺明唔係「滔」），有啲嘢亦真係有典故（「壓軸」就唔係最後，係尾二）。但人地「用錯」，咪有得人咯，唔使踢爆，唔使同人嘈。唔係朋友唔係熟人嘅，就唔好unsolicited opinion。最好都係看破，但不說破。

＝＝＝＝＝

25. 中間插一段咁嘅嘢，因為上面四首歌嘅填詞人，有三位都仲在世。我就費事有人覺得我批評佢地。實情，填詞人唔可以犯錯？中文攞A唔可以讀錯字？要出個道歉聲明？錯就錯咗，但唔使無限放大。

26. 《霧之戀》，填詞嘅係林敏聰。《夏日寒風》，填詞係林振強。《沉默的眼睛》，填詞係陳少琪。《我的驕傲》填詞係黃偉文（正係畀人攻擊話「會考攞A喎」嗰個，香港地嘅「反智」文化，又一例子）

27. 任何一個人填錯，絶不為奇。但點解會四個一齊錯？就真係不解之謎！

28. 我大膽猜測（可能錯，歡迎你反駁），好可能就係好似「抄功課」咁，第一個錯咗，第二個一齊錯，然後齊齊炒車，炒足20年。加上嗰個年代，資訊唔流通，咁填詞人自己都聽歌，心諗「呀邊個都咁填」，就唔會走去查證啦。正如以前我寫過，舊公司有個完全乜都唔識嘅洋槍，但居然之前都間間大公司，明顯係第一間公司把關不力，然後第二間又心諗，第一間請得佢，即係有個譜啦，然後就一間一間咁中伏。

29. 咁，第一個錯嘅係邊個？應該係……林敏聰。雖然我估佢會講句粗口回應你，刁，阿叔填幾千首砍，咸豐年代嘅嘢，鳩記得咩。阿叔錢已收，獎已攞，神枱已上。你咪繼續放大話美斯都踩波車紐亞都屙蛋 — 事實如此

30. 不過，我發誓，我寫文前，其實以為第一個錯嘅係林振強 — 因為唔使查都知譚詠麟嗰兩首最舊，但我未查資料都唔肯定邊首早啲。呢度亦可以講埋，你會見到《霧之戀》係1984年，同《夏日寒風》「好似」同年。但無聊事認真做，《霧之戀》1984年出，但隻碟1983年錄，咁梗係填咗詞先有得錄！況且，你計出碟時間都好，《霧之戀》年頭，《夏日寒風》係年中 — 除非你有證據證明《夏日寒風》更加早填好。

31. 我諗呢篇文時有個奇怪嘅想法，希望第一個填錯嘅係林振強。唔係因為四個人之中我最唔鍾意佢，而係因為我最鍾意佢！反正佢已經死咗，我相信佢泉下有知，都好願意「承擔所有罪名」，好似《天龍八部》個掃地僧咁，「不如天下罪孽，都歸我吧！」

32. 可惜，似乎佢都係跟車嘅其中一個。

33. 至於有冇人早過林敏聰填「閃礫」？好似唔覺。有嘅話我知。

＝＝＝＝＝＝

34. 仲有少少插曲。你上網搵「閃礫」呢個詞，唔止出現在呢四首歌。後來張學友嘅《花花公子》（1989），歌詞都有「閃礫」。但明明張學友唱嘅係「又見星光閃爍了」，明顯係「削」音，填返啱。而最搞鬼嘅係，估下邊個填詞？正係林振強！似乎係後來知道當年《夏日寒風》填錯。

35. 同樣地，你會搵到，古巨基嘅《心跳回憶》（2003），都有「閃礫」，填詞嘅係林夕。但，佢唱「從此～踏入二時差一點～一屋閃爍的光線」，明顯係「爍」。

36. 以上兩個例子，見到你搵到嘅歌詞，甚至隨碟隨帶附送嘅，甚至MV，啲字都可以亂嚟的。最好你都係聽一次首歌。

37. 我一度懷疑，2003年，《我的驕傲》後，就冇再有人填錯。點解？未必因為啲人叻咗，而係因為資訊流通咗（咁你都可以話所以啲人叻咗嘅） — 你可以諗下，之後幾年就開始有Facebook，然後係Smartphone，流通上網，真正全民普及。

38. 不過，最靈異嘅事件，係陳蕾。佢首《星願》，自己填詞。有「閃爍」（喜歡看～星星的閃爍～奪目燦爛），但又有「閃礫」（最愛可以凝望你～閃礫的眼睛）！唔知有心定無意，真係百年一遇。可能佢以為係兩個唔同嘅詞語。

39. 最後一提，同一首歌嘅「猶豫在暗示我相信就可相見」，明顯係「猶如」（定「尤如」？），音就冇錯，但唔知MV字幕錯定點啦。不過，「係咪要文學博士先可以填詞？」「紐亞都屙蛋啦」

（＊）本人嘅blog《倫伯（當年）真係好撚紅》（alantamwassored）有寫呢首歌嘅故事，可惜因為我做手術關係，個blog已爛尾。

（＊＊）慎防新一代唔知，呢首《夏日寒風》亦即係「龍虎豹/藏春閣～～～好睇～～～好睇」。個改版絶對outlive咗原版，仲要outlive埋原版填詞嘅林振強，分分鐘有機會outlive埋譚詠麟（七十了）。最神奇係，紙本鹹書居然咁有生命力！真係一個藍海市場（其實仲有冇出？頭先望過唔見，但唔敢問阿姐）

（＊＊＊）呢首歌之後李克勤都有翻唱過。但作為張學友嘅歌迷，李克勤嘅忠實歌迷 — 我都係覺得，羅敏莊唱嘅版本最好聽，但唔多人聽過。又，原版玉置浩二亦都好好聽。

（＊＊＊＊）作為容祖兒嘅鐵粉，我係唔鍾意呢首歌嘅。原因？唔知喎。覺得太過「K」，亦可能當年播得太多，聽到煩嘅地步。有趣嘅係，當年仲有人傳過呢首係改編日文歌（故事有點複雜，但首歌肯定100%香港原創），但明明2003年，已經有互聯網等等，可見當年啲資訊都係極唔流通。呢個例子，你見到社交網，流動上網同智能電話點改變咗社會。呀當然一定要講，長實泓景台廣告歌。畀你估下，「西九四小龍」泓景台當年賣幾錢尺？答案係：3000蚊有找。如果我冇記錯，好似一賣就沙士添，即係應該有得再平。而家？萬幾近兩萬蚊尺！

=====

市好個個都股神，市差先考功夫嘛。手術後重出江湖！Ivan Patreon 跌破2000人！要告急了！比別人知得多。subscribe now（bityl.co/9CyV） ，可以睇返晒以前嘅文。港美市場評點，每星期５篇，月費100有找． 畀年費仲有85折，

富途嘅，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

============