［分手的決心］你凝視湯唯時，湯唯也在凝視著你：《本能》＋希治閣《迷魂記》？其實唔係
由Poster說起
朴贊郁拒絶重覆自己
湯唯嘅非性化
套戲好「東方」，好含蓄，但好多細緻嘅浪漫
山同水嘅隱喻
主題：你有罪時我信你清白，你清白時我反而唔信。像極了愛情
由Poster說起
- 呢張Poster，已經代表到套戲。記住導演N年前已名利雙收，呢套戲搞咗6年。唔係話一定好你一定要鍾意。但真係留意，好多你以為「不足」嘅地方，好可能係特登嘅。
2. 例如呢張Poster，右邊嘅湯唯版成日出現，大家知係「蒙羅麗莎」，亦知係講「你望住湯唯時，佢亦望住你」。但男主角嗰款在香港較少出現。拍埋一齊，有樣嘢好明顯：湯唯後面嘅海，同男主角後面嘅山。
3. 另一款海報更加明顯。「山水」係戲入面用到嘅隱喻（其實都好明）。看似娘嘅海報，當然係有意思的。
4. 原本唔想寫，因為上咗成個月（雖然未落畫），亦唔係太多人睇。但見朋友間評價幾兩極，就值得寫下。我就非常鍾意套戲，睇咗兩次。但我理解到點解咁兩極，睇下我寫完後，會唔會令唔鍾意嘅人改觀。
5. 套戲好值得「評」，因為好多嘢可以講，就睇唔同人睇到乜。套戲唔會太淺白畫出腸，但又唔會高深到完全唔知做乜春。即使你覺得劇情亂嚟，又唔鍾意男女主角，你都仲可以睇畫面，聽歌，睇啲隱喻，同埋好多細節嘢。唔少人提到，剪接好好，用嚟講心理變化。就唔使乜都靠對白獨白甚至VO嘅。
TLDR：我會分呢幾個重點：1）朴贊郁拒絶重覆自己。2）湯唯嘅「非性化」。3）呢套戲好「東方」，含蓄，但唔少細緻嘅浪漫。4）山同水嘅隱喻。5）個故事主題係「你有罪時我信你清白，你清白時反而我唔信你」，映襯返「我鍾意你時你唔鍾意我，我唔鍾意你時你又鍾意我」，雙線並行，亦係故意嘅
朴贊郁拒絶重覆自己
6. 好多嘢都係期望出事。非官方統計，朴贊郁係最受我輩港仔歡迎嘅韓國導演。當然係因為《原罪犯》，好多男仔鍾意，亦都雅俗共賞，MK仔去到學者都鍾意。打後仲有《饑渴誘罪》《下女誘罪》。大家都認為，呢條友就係拍復仇，暴力，重口味，情慾。以上全部戲都係咁。
7. 略睇劇情嘅，都知講刑警男主角，監視疑似殺夫嘅湯唯，迷戀佢。咁簡單啦，即係《本能》＋希治閣《迷魂記》＋《色戒》。睇韓仔同湯唯肉搏啦，睇湯唯殺人啦。
8. 結果完全唔係咁嘅事，可能有啲觀眾就大失所望。不過如果入場前有睇導演訪問都知（但有時入場前知太多又未必好）。導演有話，故事一出街，好多人問係咪好多暴力同情慾場面，佢話：「換著第個拍唔會有人咁問咯！話定你知，冇呢啲嘢」。
9. 相當合理，導演N年前已拎大獎，啲戲亦算叫座。6年冇拍戲，度呢套，當然係苦思點突破自己，而唔係再拍一樣嘅嘢。唔再血腥，唔再暴烈，唔再重口味。唔好話做愛，呢套連茄輪都冇點打。呢種精神，係更上一層樓，千帆過盡後嘅更高層次。當然不代表你一定要鍾意
湯唯嘅非性化
10. 非官方統計，湯唯係其中一個最受香港人歡迎嘅大陸女星，而且係極少數香港女仔都會鍾意嘅大陸女星。應該唔少香港觀眾，因為佢先會睇呢套戲，換著係個不知名韓星，或大陸女星，就冇咁多人有興趣
11. 明白導演唔想重覆自己，就會明白好多嘢。故事女主角，係中國女子，符合嗰種（韓國視角）Exotic，神秘，危險又吸引嘅Femme fatale（講法文型啲）。但留意，唔係導演有呢個劇本，要拍「中國女人好危險但韓仔鍾意」，然後搵個講到韓文嘅中國女演員。剛好相反，係有咗湯唯，先有呢個劇本，可以話係度身訂造。
12. 正係睇咗《色戒》之後，導演就要拍佢。所以導演點會唔知湯唯嘅sex appeal？但你見戲入面，正好相反。湯唯好似膊頭手臂甚至小腿都冇露過！唯一露就係驗傷！造型全不性感，妝亦化得好淡。會令啲想睇靚女（甚至睇佢畀人搞）嘅觀眾失望。
13. 導演無非係想話你知：包到實都可以好性感，情（或慾）不一定要由視覺感官咁直接挑起。你buy唔buy，就另一回事。但至少解釋到，點解拍到湯唯咁「普通」。
14. 留意戲入面反覆出現嘅韓國老歌《迷霧》，後半亦經常提到個城市多霧。明顯係象徵，既講男主角睇唔透湯唯，又講兩個人之間嘅關係，五里霧中。
15. 導演以前嘅戲，亦唔太常用啲好傳統嘅美人。佢就係鍾意拍「高深莫測」嘅女人，拍嗰種「朝朝暮暮讓你猜想如何馴服我」嘅吸引力。以前仲要露肉，而家慳返。迷戀就係咁回事，就係一個普通大媽都迷到你神魂癲倒。唔係佢面孔身體吸引，而係佢食雪糕都好吸引。諗真啲，並唔係咁「超現實」，日常你都見到，桃花最多嘅，唔係最靚仔最靚女嘅朋友。
套戲好「東方」，好含蓄，但好多細緻嘅浪漫
16. 無關「識唔識」睇戲，但套戲好適合測試一個人嘅感情敏唔敏感，我相信女仔睇到嘅嘢會多過男仔（我又性別定型了）。所以唔夠細心嘅觀眾，要調節下。
17. 上面有提，睇故事大橋，咪就係希治閣《迷魂記》，或者係《本能》。可以話《本能》更加似，一樣係刑警，迷戀疑似殺人兇手嘅神秘女子。但拍出嚟就完全唔同，莎朗史東就要唔著底褲蹺腳，湯唯就包到實一實。
18. 戲入面唔止冇床戲，身體接觸都唔多，對白亦都極之含蓄。就係在啲細節位，畀你見到嗰啲「浪漫」，同埋畀你見到「誰和誰有路」。換香港人熟悉嘅語境，就係「篤檸檬」「剝蝦殼」（well）之類
19. 例如在差館，男主角外賣高檔壽司，兩個齊齊食。神來之筆係拍檔在側邊問：喂，原來開公數可以食呢啲？ — 話畀你知貴嘢，而係男主角自己畀錢。仲要之前男主角叫同事唔好食咁貴。仲要去到下半場，男主角在另一差館再遇湯唯，就求其質隻熱狗畀佢食 — 呢啲就係感情變質啦。熱狗as a metaphor
20. 好簡單嘅手法，畀你睇到咩係show, don’t tell。甚至唔使兩個去食米芝蓮湯唯著條吊帶裙咁。就係拍呢啲「普通人生活中嘅小浪漫」。食完仲齊齊執枱，儼如小夫妻。
21. 類似嘅嘢仲有好多，例如男主角同佢煮飯仔，「我只係識煮呢味中國菜咋」，明顯賣相唔靚。湯唯拎住個鑊就咁試味（又一「親密」動作），然後話「呢個係中國菜嚟架？」，但然後話「好好食」，再繼續食 — 就唔需要講到出口話「好多謝你為我下廚」
22. 去到男主角失眠，湯唯幫佢入睡，大家「呼吸一致」，心跳同步，更係性感到不得了，絶對唔係兩個做愛然後就累極瞓著（雖然呢個比較貼近現實）。留意套戲唔係真係冇「情慾」鏡頭，男主角同老婆就有！但亦係咁樣映襯畀你知，「冇感情嘅就有得做都係例行公事」，「有感情嘅唔做都好爽」。至少導演咁表達。
23. 寫到呢度，就令我諗起金基德嘅《空屋情人》 — 一樣係拍「心有靈犀一點通」，吉人之辭寡，係啲俗人先咁多嘢講咁撚嘈，男女主角成套戲夾埋得一句對白（最尾先出現！），有對白嘅全部係啲麻瓜。亦都係金基德話你知「邊個話我一定要拍重口味」（套戲亦係哥爾夫球3-Iron as a metaphor，月光有人撈起有人瞧不起，都話評審鍾意呢啲嘢）
24. 係真係唔使咁撚多嘢講的。所以我又諗起《阿媽有咗第二個》
山同水嘅隱喻
25. 呢類metaphor或symbol，偽文青實要識，亦有人話搞到啲導演迎合啲影評人，唔知雞先定蛋先。亞洲導演更會畀人認為係特登迎合鬼佬。好多舊時代嘅港片唔興呢味，但王家衞就興（例如《旺角卡門》嘅水杯代表「正常生活」），王家衞仲好鍾意玩顏色，呢啲上Youtube好多片有解，總好過你睇谷阿莫
26. 除咗之前講過嘅「霧」，呢套戲最重要嘅symbol就係「山水」，東方主義，應該睇到啲鬼佬好開心。事實都唔「隱」，好明了，poster都一山一水。
27. 湯唯在戲入面，講咗句「智者樂水，仁者樂山」，咁突兀嘅對白，係用嚟點題的。湯唯就係智者，神秘聰明，男主角就係仁者，沉實穩重。女人就係水，男人就係山。
28. 仲有，套戲上半部係山：登山，釡山，湯唯個老公就係行山跌死。下半就係水：有海嘅梨浦，第二個老公就海邊死，套戲結局亦在海邊。
29. 呢啲東西，有啲刻意。但留意下自己有冇發現到。
主題：你有罪時我信你清白，你清白時我反而唔信。像極了愛情
30. 理解咗上面嘅嘢，個故事就冇咁難明或奇怪。導演訪問有講，呢個既係懸疑戲，又係愛情戲。佢話刑警vs 疑犯，互有攻守，就好似男女角力咁，所以劇情係兩者一齊拍。
31. 湯唯因為身世悲慘，變得好敏感好聰明，仿似天真又深藏不露（海呀）。殺咗老公後，好快知道刑警男主角迷戀佢。佢利用咗男主角幫佢脫罪。男主角嘅同事一路都認為湯唯好可疑，但男主角因為迷戀，堅持佢清白，最後甚至成為共謀。但男主角始終係正直，知道真相後佢感到羞恥，亦覺得「信錯人」，恨自己畀慾念掩蓋咗理智。最後「情義兩難全」，無地自容，唯有離開呢個地方。
32. 下半部，就講湯唯再嫁，但對刑警念念不忘，不經不覺原來動咗真情，畀佢嘅單純正直打動咗（山！）。湯唯索性搬去嗰個城市去「偶遇」佢，然後就利用「兇案」，希望再接近佢（呢部份可能係嚟自傳說中嘅「FBI題目」：在葬禮上見到嘅男人）。今次同上次正好掉轉，湯唯唔係兇手（佢只係「利用」其他人），甚至真兇都自首咗，但男主角點都認為湯唯係兇手。因為佢嘅恨意再一次影響佢判斷，「仆街，又想利用我？Fool me once shame on you, fool me twice shame on me」。佢對湯唯嘅迷戀已經變成怨恨
33. 呢個「清白 vs 無辜」嘅互換，亦正係男女主角嘅感情互換，最初係男嘅鍾意女，後來掉轉。導演話頭，愛情就如審犯，你攻我守
34. 所以，先有湯唯嗰句點題而突兀嘅：「當你說愛我的時候，你對我的愛已經完結」「當你的愛結束時，我的愛就開始了」 — 呢個位都係要劃出腸，等觀眾評審記得。
35. 其實就係陳奕迅《一絲不掛》，拉拉扯扯。男主角覺得好不容易圥放低你，回歸返「平常生活」，你做乜又搵上門，又想借我過橋？仲玩我唔夠？當我傻仔？但女主角諗嘅正好相反：點解你覺得我就係壞人？雖然我殺過人，但難道我就不配被愛嗎？呼。好老土，但就真係睇execution 了
36. 有人覺得，冇乜說服力喎，兩個做乜會咁迷戀對方？湯唯嘅視點比較易理解：身世可憐，又被人家暴，一個女人仔在韓國，又寂寞。過咗男主角一棟，覺得有虧欠，加上男主角善良，唔同之前啲家暴老公，佢傾心十分合理。
37. 但男主角呢？做乜迷戀呢個全不性感嘅女人？就只係因為佢神秘？
38. 我認為，亦係因為佢「本身」，唔多唔少亦係就手。佢要搵人愛，只係湯唯咁啱出現在咗。好多愛情都係咁架啦，就係偶然嗰個人在嗰個時間出現咗。好多時呢啲迷戀嘅「病因」，係嚟自自己（自抽：正如我教書時迷戀隔離班嘅班主任）
39. 睇男主角嘅背景，都會睇到啲嘢。長年工作壓力，長年失眠。唔係冇老婆又唔係感情好差，但聚少離多（唔同城市工作），唔係好過電，同老婆做愛已經成為例行工事，要交功課（後來仲知道老婆有外遇）。明顯佢係中年危機，要搵「存在意義」，一聽到有兇案佢就好興奮，有無辜少婦畀佢打救佢更加開心。
40. 接受到上半場，其實下半場就幾有說服力。佢最初相信湯唯無辜，發現自己錯，已經太遲，唯有幫佢一齊掩飾真相。受良心受責備，但又覺得自己做乜咁笨柒，畀人老點，男人自尊心受損。所以就解釋到，點解湯唯再搵佢時，佢嘅防衞機制即時啟動，覺得「喂你又嚟玩我？」，而根本唔明白湯唯係因為掛住佢。男女大不同，山是山，水是水。
＝＝＝
41. 不過我承認，個故事去到最尾有啲失控，有點造作（雖然個畫面幾靚）。但就係讓大海嘅回歸大海，每個人都有佢嘅過去，呢個就係一個「埋葬」過去嘅故事。
42. 好吧，你咁鍾意破案，我就等你慢慢搵搵搵，「要成為你一生嘅懸案」，唯獨係咁你先會記得我。你有冇講過「我愛你」？唔話你知。你啲錄音？我刪晒。夠變態
43. 後生嘅讀者可能唔明，鍾意咪鍾意，做乜搞咁多mind game？呼，但有時啲嘢真係有緣無份呀，唔係唔肯講清楚，而係講唔清。大家都有自己嘅心魔，錯嘅時間，就變咗錯嘅人了。
44. 你可以話我偏心，做乜《阿媽有咗第二個》咁乾淨我就話離地，呢套戲咁乾淨我就話「導演就係要話你知純精神都好性感」（其實孤男寡女共處一失煮飯仔點會唔搞？）。不過我諗我唔係偏心導演，但的確好鍾意套戲。
=====
合作或工作安排請PM 或email ivankirsten@gmail.com
=====
手術後重出江湖！Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，每星期５篇，月費100港紙有找． 畀年費仲有85折
