史上最詳細海洋公園死因研究：之前發到咁大，到入場人數一點，點可能唔輸錢？（１／３）
［史上最詳細海洋公園驗屍報告］照計全香港冇一個人有咁詳細嘅數。公園連蝕8年，輸咗72億。而納稅人已經泵咗62億 — 不過好快又乾塘，又要伸手。點收科？
0. 疫情前已寫過海洋公園，無意叫你考古睇舊文，但想強調返佢地當時已面臨資不抵債，要納稅人救。所以唔係「因為」疫情先財困，亦所以唔好以為之後就會冇事。係結構性問題
作者Facebook Page ：https://www.facebook.com/meatbonetea 金融肉骨茶
1. 基本資料：以下係歷任主席：陳南祿（00–03），盛智文（03–14），孔令成（14–20），劉鳴煒（20–22），龐建貽（22 — ）
2. Excel圖亦有以上嘅任期，數字係港紙百萬。個Excel File我會放Patreon，你可以資助下我然後拎去用。Excel除咗上面個圖，仲有啲其他嘢。但呢篇文會有其他圖表輔助。
3. 海洋公園6月底年結，所以以下文中寫22年度，就係21年7月頭至22年6月底。
4. 早排我寫過23年海洋公園話自己「轉盈」嘅搞笑 — 實情係蝕7億，但拎咗政府8億，所以「賺1億」（https://fbook.cc/4yR4__0">__0">__0">）
5. 今次呢幾篇，前世今生，乜都睇晒。首先講數字。第一部份睇公園歷來各樣數字嘅走勢，點樣年年蝕錢年年拎錢。第二部份睇返各個主席任內，各樣嘢嘅變化。唔一定同主席有關，亦睇埋大環境。第三部份，睇下海洋公園到底有冇可能真係自負盈虧（答案：好難）。睇晒數後，第四部份先討論其他嘢，睇下應唔應該畀佢繼續蝕，睇全球大勢，講海洋公園似乎早已完成歷史任務，除非極重手咁轉型或縮減規模，否則神仙難救。
TLDR：盛智文年代，雖然人人話好，年年賺錢，但佢年代大興土木，公園由8億資產發脹到80億，由唔借錢，變到貸款50億。結果後人年年孭住幾億折舊幾億利息，到收入一跌，點可能唔輸錢？社運前疫情前，孔令成年代，都仲有600萬入入場，但依然年年輸錢。嚟緊似乎只會更少人入場，點會唔輸錢？
（第一部份） — 睇公園歷嚟各樣嘢嘅走勢
6. 首先，最簡單，睇下海洋公園歷嚟蝕咗幾多錢，當然係計扣除政府補貼前嘅盈虧。睇圖1，答案係連蝕8年，輸咗72億。
7. 疫情前公園申請100億資助__0">__0">__0">，全城嘩然，亦係嗰時我開始寫文。點知後來爆疫情，就真係開口中，話咁快已累燒72億，唔知好嬲定好笑。
8. 輸咁多，固然好大程度係疫情同社運，但睇返現實：社運前公園都連蝕4年，明顯唔只係「因為」社運同疫情，係結構性問題
9. 拆開呢72億虧損：孔令成年代，6年蝕咗5年（第一年少少盈餘），6年夾埋輸24億，最後一年撞著社運疫情。劉鳴煒年代，食晒成個疫情，兩年輸40億。龐建貽年代，開始復常（23年頭開關），但今年都輸7億。留意當中有社運同疫情因素，我冇話蝕得多嗰個一定做得差。
＝＝＝＝＝＝＝＝＝
10. 然後，圖2。疫情開始後，政府（也就是眾多納稅人）注咗62億公帑補貼公園。嘩！
11. 當中你可以話有啲係保就業，並非公園獨有。對，但嗰度應只佔1.2億，好細嘅數（https://bityl.co/NDuM__0">__0">__0">）
12. 62億（and still counting）補貼好多咩？大家往往對啲太大嘅數字冇乜概念，所以拎其他嘢比較下：政府一年嘅財赤或盈餘，先係幾百甚至幾十億。七嘴八舌嘅股票印花稅，亦只係一年幾百億。薪俸稅博彩稅，都只係幾百億。我就認為62億唔係細數
13. 甚至都未計，嗰62億資助嘅「機會成本」 — 拎去做定期，都幾億一年了
＝＝＝＝＝＝＝
14. 睇完蝕錢同注資，我地睇公園嘅「淨資產」。即係總資產減總負債，也就是個「權益」。同你銀行戶口甚至舖頭收銀機差不多，有盈餘個淨資產就會升，虧損就跌，有人注資就再升（派息畀納稅人淨資產就跌，但發夢冇咁早）
15. 呢個數字如果去到負數，就即係「資不抵債」，負資產。但當然，海洋公園主要只係爭政府錢，除咗政府外，唔會有數找唔到，亦唔會有人清佢盤。
16. 又係睇圖，圖3。盛智文起身時，大約係20億淨資產。咁上面講咗，孔令成嗰6年，輸咗24億，已嘔突。劉鳴煒年代再輸40億，龐建貽年代今年再輸7億。
17. 而所以，政府呢幾年前後注資62億。計計數：20–24–40–7+62=11，而家公園淨資產，就係11億上下。留意23年都蝕咗7億（可能來年蝕少啲？），咁呢11億，可以頂到幾多年？好可能好快又要政府打救。無底深潭，先係最大問題。
＝＝＝＝＝＝＝
18. 上面講到盛智文年代留低咗20億淨資產，「後人」話咁快蝕晒。加上盛智文任內的確年年賺錢，形象又好。但，係咪真係咁簡單？我無意獵巫，但提供啲比較少人講嘅角度
19. 睇圖4，公園嘅資產，當然多數就係啲PP&E，物業廠房設備，包埋啲遊樂措施。你見到，盛智文年代，公園由8億資產，發大到80億。在佢任內，海洋公園由手作仔，變成大件頭（白象？）。幾年間資產10倍喎！私人公司都少見
20. 原因？大搞囉。亦好可能因為「迎戰」05年開幕嘅迪士尼。
21. 咁你話大搞有乜唔好？佢年代年年賺錢喎，係丫，但之後呢？我唔知當年有冇制約呢啲嘢，好可能冇。睇在佢賺錢份上，應該冇乜人出聲。盛智文就識玩，而亦畀你見到呢啲「官僚」嘢，當然係有咁大發咁大，用公帑幫自己賠金省靚CV（公平講：私人機構亦有呢種問題，但唔係公帑，就唔關其他人事）
22. 你都係唔明，發大資產有乜唔好？問題係會計101：呢70億買入嘅PP&E，係要之後年年入折舊開支的。
23. 亦即係話，打後每一年，公園都要硬食3–4億折舊。睇圖5見到啦，冇呃你。
24. 咁有乜問題？年年硬食呢3–4億折舊，到你入場人數一跌，收入一跌 — 咁你咪一定輸錢囉！企鵝可以食少啲，員工可以炒同減人工，但呢啲折舊，硬食的。咁人數一跌，你點能夠唔輸錢？
25. （點解最近一年折舊開支細咗？因為公園上年一鑊過，將啲嘢極大手減值！一下減咗17億。公園資產由85億落到67億。圖4都見到）
26. 於是乎，盛智文走去，就留低呢啲嘢畀下手了。真識玩，事後睇返，走人嘅時機一流！佢走嗰年就係自由行見頂嗰年！但你話佢精甩邊？我覺得佢係命水好到不得了。因為，佢應該係畀人迫走的（當然係咪「以進為退」，冇人知）
＝＝＝＝＝＝＝＝＝＝＝
27. 睇多樣嘢，睇下盛智文年代點樣「大搞」，有意無意留低蕉皮。
28. 好簡單，睇net debt，就係貸款（銀行或政府嘅貸款），減去現金，圖6。陳南祿年代，直頭係冇貸款，net cash淨現金．盛智文年代中期，迪士尼開幕後，就開始大手舉債。由0貸款，玩到去50億貸款，公園亦由net cash變成淨負債30億。
29. 咁有乜後果？好簡單，借錢係要利息嘅。睇圖7，後來海洋公園就年年硬食2億利息
30. 於是乎，年年硬食幾億折舊，2億利息。到孔令成年代，入場人數一跌，點可能唔輸錢？就唔係啲冷氣軍師講，點樣吸引人入場就解決到
31. 孔令成年代，年年輸錢，應該息都冇還到畀政府，積上去，借貸就越滾越大。但知唔知點解而家利息開支係零？點解而家淨借貸會變返幾億？
32. 因為，政府補貼呀！減免啦！爭納稅人嘅錢唔使還！一筆勾銷！得咗！
＝＝＝＝＝＝＝＝＝＝＝＝＝＝＝
33. 你見我留返收入，去到最尾先講。反正下篇講歷任主席任內情況，會再詳細講一次。簡單嚟講，開支不停升當然係問題，到收入一跌，就出事了。開源，你估話咁易？
34. 睇圖8，公園歷年嘅入場人數（藍色bar，左軸），同埋收入（紅色折線，右軸）。
35. 你見到，根本成個圖，係同自由行數字，差不多完全一樣！2015見頂
＝＝＝＝＝＝＝＝
36. 所以可以提早解答一啲迷思：有人話海洋公園「失焦」，只靠內地客，令本土客同其他遊客離棄云云。之後我會同你詳細計數，但其實諗都諗到：Pre自由行年代，公園唔夠300萬人入場。呢個數字，不可能養起已發到咁大嘅公園
37. 我甚至唔同你計移民潮，個個去日本返深圳，外地客唔多嚟香港等等問題。我就當你好似pre自由行年代咁，有300萬入入場 — 但而家啲開支發大咗咁多，每年硬食幾億折舊。得300萬人入場，唔靠內地客，有乜可能唔輸錢？事實上今年（23）就有210萬人入場，多數都係本地客，而公園係蝕咗7億
38. 又換個角度睇：孔令成年代，600萬入場都要蝕錢。23年度未完全開關（記住6月年結），得210萬人入場。24年度你覺得可以有600萬人入場？我唔敢話冇可能，但，「想賭幾多？」
39. 而盛智文，亦都只係ride on 佢任內自由行開始。公園入場人數，亦由陳南祿年代300萬，升到近800萬。但佢就真係成個任期食晒呢個紅利，到佢一起身，亦係自由行見頂嘅一年，命水幾好。折舊利息？就下手，同埋納稅人埋單吧。好難完全怪罪於佢，但客觀就見到咁。
40. 講到尾，唔係自由行，海洋公園就只會死得更快。但自由行都見咗頂，公園點收科？我就唔知
41. 公園唔係商業項目，冇乜錢賺完全唔係問題，甚至蝕少少錢都唔係問題。但，而家年年幾億幾億咁蝕，不停拎納稅人錢，唔係辦法。更何況聽講政府都幾莫財。盛智文年代，唔知係冇人理，定見有錢賺就算，結果公園發到咁大。而家點收科？
42. 我甚至都未講，納稅人嘅錢，相信都唔少去咗啲高層度。你估企鵝真係好貴咩
43. 幾廿年前，大家飛機都未坐過，唔會一年去幾次日本。冇迪士尼，冇環球影城，去荔園都好開心。然後社會進步，香港人個個周圍飛，咁自由行嘅大陸客，就接棒，fine．但正如上面講，自由行都有見頂嘅一日，大陸人去過海洋公園亦未必會再去，大陸人亦識去第度旅行，甚至大陸都有自己嘅景點。靠自由行吊多咗十年八年命後，海洋公園又要面對現實
44. 介紹返：經過納稅人泵咗咁多水，公園而家爭政府嘅錢，已經大幅縮減到只係20億（因為已經勾銷晒）。唔止，公園仲有17億現水。其他負債，亦只係30億左右。
45. 換言之，其實「成間摺埋」，可能都只係多幾十億 — 呢幾年下都貼咗62億啦，係咪？但多幾十億，可能就真係斷尾。
46. 講話執咗佢起樓，可能太過極端。不過我幾肯定，公園要有一個「徹底」嘅轉型。而一定係downside，唔係再大搞。你話咩保育海洋生物嘅（其實仲係咪有必要？大灣區啦），你話小朋友要有個地方玩嘅，fine — 但肯定唔係盛智文嗰種80億資產嘅規模。
作者Facebook Page ：https://www.facebook.com/meatbonetea 金融肉骨茶
Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，月費100港紙有找． 畀年費仲有85折
