［寫於德甲煞科前］拜仁歷代教頭成績。拿高士拿抵唔抵炒？杜曹呢？拜仁又係咪特別冇耐性？今季係咪特別差？定只係多蒙特特別勁？
- ［寫於德甲煞科前］今季難得德甲鬥到最後一輪，值得寫下。其實2018/19都係鬥到最後一輪，最後一輪前都係兩分之差，但係拜仁領先。今季就掉轉，多蒙特領先兩分。
- 可能有錯，肯定唔及啲死粉咁熟，但盡量寫下。但，到底拿高士文教得係咪差？抵唔抵炒？杜曹呢？拜仁又係咪特別冇耐性？定只係多蒙特勁？
2. 拜仁上星期在德甲，關鍵時刻主場輸波，而家落後多蒙特兩分。得返星期六最後一輪。多蒙特只要主場贏到波，立即封王，唔使理拜仁嗰邊任何賽果。相反，拜仁最後一輪，作客贏唔到波，和波輸波都即時玩完。即使拜仁作客贏到波，都要望多蒙特輸波或者和波（如果拜仁贏波多蒙特和波就同分，但拜仁得失球領先好多）
3. 咁，當然而家熱門係多蒙特了。但，當然仲有變數。留返之後先寫。
4. 不過，除咗唔少人幾心涼外。仲有一個問題：係咪炒錯拿高士文呢？又係咪搵錯杜曹？暫時普遍人都傾向認為係。
5. 但，拿高士文帶得有幾差？杜曹又係咪更差？以前啲友又教成點？係咪太快炒拿高士文？
6. 場上同八卦新聞就留畀眾多專家，我又係冷血地睇下數字。
TLDR：畀咗結論你先：我自己認為，拿高士文被炒時的確去到「紅線」，德甲啲成績近N年最差，但歐聯踢得好好，理應畀多少少時間。至於杜曹，今季嘅表現明顯唔合格，仲衰過拿高士文。歐聯出局未必入佢數，但德國盃出局難睇，而教德甲都係一鑊泡嘅。雖然時間尚短，即使佢失落德甲可能都未即炒。但下季冇極明顯改善嘅，怕且都捱唔到下季季尾。
7. 睇圖，1998年之後嘅拜仁教頭，踢走咗暫代嗰啲。點解1998？因為我開始認真睇拜仁，歷史由我開始，你鍾意可以由1900年前計起嘅。
8. 圖入面嘅數字就只係德甲，歐聯德國盃歐霸唔知點計，難啲量化，但中途會提到。
9. 另外，基本上「提早解約」嘅就叫做炒，即使話「雙方同意」都係當炒，軒斯菲特第一鑊都係提早一年被雞，當係炒。至於到期唔續，「死於自然」嘅就當唔係炒，費歷克走去教德國就唔算係炒（雖然聽聞同沙利咸美錫炒大鑊）
10. 仲有，嚴格嚟講，其實應該睇啲友被炒最後一季嘅數，而唔係成個任期。不過懶搵，你鍾意自己計。另外，話說回頭，分數季季清，但又真係有啲「感情分」，軒斯菲特第一鑊教到尾段都幾唔掂，但早年教得好，拎埋歐聯，所以玩到咁耐。
＝＝＝＝＝＝＝＝＝＝＝＝
11. 好啦，先睇最底，「平均」或者「中位數」．先睇任期，留意軒斯菲特第一鑊後（6年），啲教頭教嘅時間唔算相差好遠，多數都係兩年貨仔咁上下。感覺拜仁唔算特別冇耐性，亦唔算特別好耐性（你可以同其他會比較下）。好少一季唔夠就炒（除咗奇連士文），亦好少玩到三季（除咗哥迪奧拿）。計年期，拿高士文一加大半季，唔算特別長命或短命。但個人覺得都係早左啲，應該畀佢玩到季尾。
12. 另外睇個得勝率，平均或中位都係66–68%之類，低過呢個數嘅就往往早死。和波率就20%左右，輸波率14%左右，相對地唔算波動好大（但見到近十年贏波率係高咗嘅，陣間講）。爭得遠嘅就炒。
13. 另外，相當得意地，你見教得最好嗰啲，「就唔吼拜仁」，自己唔玩。哥迪奧拿走去教曼城，費歷克去教德國，希歷基斯就兩次都光榮收山。我覺得呢個係管理層要檢討下嘅。（異數係安察洛堤，被炒時啲德甲戰績都仲係相當好，主要原因歐聯輸得核突，同埋好似同啲球員唔妥）
14. 然後睇場均得分，其實睇上面得勝率和波率都計到。場均就係2.2分左右，唔到位嘅，就落鑊。
15. 於是你睇到啦，有兩個特低嘅，亦係評價最差嘅。奇連士文同雲戈爾，嗰期亦係拜仁嘅低潮。當然你可以話啲人腳唔掂。但雲戈爾走後，即係2011年開始，就漸有起色，之後德甲十連霸，歐聯入咗三次決賽，捧咗兩次盃。
16. 亦都可以比較下，奇連上文之前，即係1998–2008呢十年，拜仁雖然都捧過歐聯，但在德甲嘅優勢冇而家咁明顯。你睇軒斯菲特第一二鑊，加埋惡名昭彰嘅馬加夫年代，場均都係2.08分（軒斯菲特仲低過馬加夫，估唔到呢？但佢拎咗次歐聯。同埋形象人緣明顯好過馬加夫，而馬加夫玩到德甲第四，要踢歐霸）。明顯低過雲戈爾走人後最近呢十年。
17. Sum up：1998–2008年（軒斯菲特X2 + 馬加夫），拜仁幾好，但冇而家咁惡，德甲場均得分2.1。2008–2011，奇連士文雲戈爾嗰幾年，真係黑暗期，德甲場均得分1.9。2011年後，「後雲戈爾年代」，翻生，在德甲真正獨大，場均得分2.4。點解？主要都係錢，但不在本文討論。
18. 你會見到，得勝率最高嘅，全部係近十年嗰堆人。希歷基斯（兩鑊，仲拎埋歐聯），哥迪奧拿（德甲無敵，拎唔到歐聯，但會方肯畀時間，只係佢想走），費歷克（同哥迪奧拿有啲似，但拎埋歐聯，一心教想教德國，同埋聽聞同沙利咸美錫唔妥）。
19. 異數就真係安察洛堤，講多次，德甲數字唔差，但歐聯輸場波幾難睇（不過只係分組賽），同埋好似同球員唔妥。居然被炒。事後睇返肥安教皇馬教到識飛，似乎係拜仁炒錯人嘅，不過有時又要睇人夾人。
20. 真正最差，大家睇到，係尼高高華。場均2.2分，略低過「長期平均」，同「後雲戈爾年代」嘅2.4更爭得遠。呢個明顯係「後雲戈爾年代」最唔掂嘅教頭
＝＝＝＝＝＝＝＝＝＝＝＝＝
21. 好啦，講咗咁耐，到拿高士文。其實得唔得？我覺得……一半半，至少第一季合格。拎到德甲，場均2.3分，高過「長期平均」但低過「後雲戈爾年代」平均。不過歐聯八強輸畀維拉利爾，難睇。
22. 今季呢，又係一半半。佢被炒時，3月，就剛好失落德甲榜首。場均得分2.08，係幾唔掂下。但仲有唔時間，亦唔係大落後。
23. 但做乜好似好多人都認為佢唔值得被炒？甚至好意外？（我都好意外）
24. 因為佢今季帶歐聯實在好。你即管可以話「佢未遇到強勁對手」（國際米蘭入決賽表示…..），但，佢被炒嗰時，歐聯剛入八強，八戰全勝。對住巴塞（西甲冠軍），PSG（法甲冠軍），國米（入歐聯決賽添呀！），全勝，兼且一球冇失過！
25. 歐聯呢個戰績，而德甲只係落後少少，3月對曼城前就被炒，似乎唔多公道。即係，當平行時空，佢一樣八強畀曼城技術擊倒，一樣季尾失落德甲冠軍，季尾換人，就比較講得通。
＝＝＝＝＝＝＝＝＝＝＝＝＝
26. 走馬上任嘅杜曹呢？往績唔使懷疑。但，歐聯對曼城出局，可以原諒（皇馬都吞四蛋啦）。德國盃出局，都仲算啦。不過，德甲都危危乎，就說不過去了。
27. 雖然可以話sample size唔夠大，但杜曹8場德甲，5勝1和2負，場均得分2.0。其實，後雲戈爾年代最差，差過拿高士文被炒嗰時（亦即係今季杜曹接手之前嘅成績）。
＝＝＝＝＝＝＝＝＝＝＝
28. 結論？講乜都冇用，唔炒都炒咗，德甲炒車與否，杜曹照計點都仲有半季甚至大半季貨仔玩，你睇奇連士文都玩到大半季，拜仁唔算太冇耐性（況且錢多，而歐聯位又實冇走雞 — 雖然以前試過玩到歐聯位都冇）
29. 不過，我依然覺得，對曼城前炒咗拿高士文，十分錯。可能最後都係出局，但我估德甲唔會咁頹。杜曹接手後，拜仁專心德甲但都走樣，佢自己都話唔知點解。杜曹能力肯定有，佢亦教過大會，教德甲都好多經驗。做乜走樣？唔知，可能係球員唔服佢。
30. 結論？拿高士文都唔係死得好冤枉，佢走時拜仁在德甲都真係幾差了。但歐聯真係交到貨，似乎應該季尾先郁佢吧。
已經1900人 訂Ivan Patreon！（bityl.co/9CyV） comment 都有link
=====
Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，月費100港紙有找． 畀年費仲有85折
====
合作或工作安排請PM 或email ivankirsten@gmail.com__0">
