英超冬季轉會窗洗費大倒退，搞乜？
作者Facebook Page ：金融肉骨茶
https://www.facebook.com/meatbonetea
［英超轉會窗洗費大倒退，搞乜？］實情唔少東西，之前啲文都寫過。另外，之前在都會大學（前「公開大學」）個talk都講過啲基本嘢。但學員最有興趣係乜？就係聽完啲基本嘢，然後可以用嚟「解釋現象」，咁佢地就覺得有用啦。呢個態度絶對啱，畢竟呢啲唔係Pure Maths，一定係因為「解釋到現象」，啲人先覺得要認識。
TLDR：英超冬季轉會窗，洗費係上季嘅…..七份一，十年最低。法甲成為洗錢最多聯賽，英超十幾年嚟第一次唔係洗得最多。而20間會，11間一個仙都唔洗，亦係史上最多。搞乜？冬季轉會窗最大贏家，當然係PSR。但同時足球轉播費見頂，更加係大問題
1. 首先睇堆數字：今次冬季轉會窗，洗錢最多嘅聯賽，係……法甲！第二係巴西。英超落到第三。十幾年以嚟，第一次唔係英超洗最多錢。
2. 另外，冬季轉會窗標王，係巴塞嘅洛基（Roque），但其實舊年夏天已傾成，轉會費40m。第二係拜仁由加拉塔沙雷簽入保爾（Boey），轉會費30m．第三先到熱刺嘅達古辛，25m．銀碼細得很，而拜仁可以排第二已經夠反常。
3. 英超球會冬季轉會窗總洗費，120m（歐元，下同） — 舊年係840m。固然上一季係多得車路士，但再前一季都仲有350m．事實上英超嘅轉會洗費，唔計疫情嗰季的話，十幾年最低了。120m嘅轉會洗費，講緊係2006年，曼聯簽維迪艾夫拿，阿仙奴簽艾迪巴約，嗰個年代嘅洗費。
4. 仲有，傳統嘅迫科（唔計曼城熱刺，唔好問我點解），全部零洗錢。英超11間球會冇洗錢，超過一半，呢個數字係史上最多。上季呢？得1間冇洗錢增兵。
5. Of note，英超洗錢最多係水晶宮，原因不明。但另外係熱刺同維拉，因為想搶前四／五／六，因為歐聯好重要（特別對維拉）。而法甲其中一間洗錢最多嘅，正是里昂。點解？之前包尾，唔想降班，同埋可能仲想搏歐洲賽位。美國班主嘅嘢，得就得，唔得就返順德。（又，水晶宮同里昂同一個班主呀下）
6. 但其他會呢？迫科又唔使爭歐聯啦？曼城利物浦坐定粒六啫，「曼聯呢？」。仲有，紐卡素車路士又唔使爭歐聯位？
7. 搞乜？當然係有啲嘢。
＝＝＝＝＝＝＝＝＝＝＝
8. 先講兩個冇咁重要嘅原因：第一個，因為亞洲盃同非洲盃，難傾轉會，亦都怕傷兵，保守啲好。
9. 第二個原因都重要，好重要：轉播費收入受壓。英超以外嗰啲，應該見咗頂。點搞？
10. 英超本土嘅轉播費，都見埋頂，之前傾嘅刁，表面上有增長，但魔鬼在細節。以前三季，而家四季，咁金額梗係大咗。另外，今次係pack多好多場賽事。如果斷場計，根本平咗（但係咪可以咁計，另一回事。你睇歐聯嚟緊都係咁，總額大咗，但賽事多咗）。當然英超海外轉播費應該仲有增長，但怕且都只係玩多幾年貨仔。現實係，「得啲廢老先坐定定睇波」（NBA都面對同樣問題），新一代消費模式唔同，誘惑多好多。
11. 但當然，好多人都知個主要原因：PSR，或者FFP。而呢樣嘢又同上面講嘅廣播費有直接關係。
＝＝＝＝＝＝＝＝＝
12. 之前冇FFP PSR咩？有。但執行得唔嚴，況且又有寬限期，又計三年，然後疫情下又再放寬少少，搞得嚟都好多年。
13. 況且，之前球會覺得，轉播費一路增長，一路都可以「透支未來」。你去假設十年內嘅轉會費一路升，自然「計得掂數」 — 但如果唔係呢？
14. 而最重要當然係：愛華頓畀人祭咗旗。客觀嘅後果，就係大家知道「嘩，嚟真架喎，真係扣10分喎」。
15. 而同時間，歐洲足協嘅FFP，亦都越搞越緊，原本只係睇你蝕唔蝕錢，而家連你拎幾多錢買人，出幾錢糧，都會管。
16. 咁所以，啲會咪「冇錢」 — 你估真係班主無限金錢就點玩都得？「我鍾意300億贊助個心口，吹呀？」（民建聯賣書法咩），「我鍾意賣咗個場市政府起個新嘅，吹呀？」（而家唔得了）。「我班主就係有錢，有錢輸，自己上身，有乜問題？」（而家唔得了）
17. 愛華頓被重罰，球會就要認真計數（一向都計，只係以前心存僥倖，諗住唔會真係咁嚴）。有啲計到再狂買人就出事，自然勒緊啲。
18. 另外，之前都唔得閒寫，但大家都有聽過紐卡素車路士想賣主力。「明明已經踢得差仲要賣？」，因為冇錢！PSR計三年，你睇到之前兩年嘅數，亦即係今年你要有舊大錢「進帳」先得。所以必定要賣人，賣到青訓更好（車路士最拿手）
19. 咁但做乜車路士紐卡素都冇賣到人？答案係：我都唔知。不過不離以下幾個因素：第一，你想賣啫，邊個買先？買家都要睇住自己條數。而同時間，全世界知你等錢用，未必會畀好價你，「等你爆煲星散仲好」。另外，亦可能車路士紐卡素見到，既然冇水魚，都唔係好填到數（拜仁傾查比亞就似乎只係想齋借唔買，就傾唔埋），不如等多半季，睇下搏唔搏到個歐聯。而仲有第三：夏天，可以再等中東佬打救（又，個人估計：紐卡素情況仲危啲，因為車路士賣青訓真係有一手，唔係英超第一都肯定係第二）
＝＝＝＝＝＝＝＝＝
20. 中東佬嘅「廢物回收」，的確係一大變數，甚至係搞亂晒PSR FFP，我幾想知會點收科。以前都寫過，你要填數錢咩？我5000萬同你買賓施馬咪得（舉例）。因為PSR FFP管唔到沙特球會 — 不過呢種玩法，絶對江湖多事。咁即係你班主同中東佬好朋友，就有人包底。「咁猶太人班主點算？」，仲有，你啲球迷球員，仲敢唔敢鬧沙特阿拉伯冇人權恐同冇民主？嘻。
21. 有趣嘅係，你見冬季轉會窗，中東佬並冇玩廢物回收。原因不明。唔知係食滯咗丫，冇心情丫，鍾意夏天先出手，定點？軒達臣都玩到返荷蘭，係咪中東成套嘢已玩爛？但如果呢套「廢物回收」話咁快唔玩，咁嚟緊夏季轉會窗，一樣會靜（但亦有人估夏天就又再變瘋狂，中東佬冇理由開咗個頭唔玩。呢啲就任你估了）
＝＝＝＝＝＝＝＝
22. PSR FFP之類，有排拗。「其實都好難講對錯，睇你捧邊隊」。現實啲講，好多年前都睇到勢在必行，就睇你識唔識玩。
23. 幾客觀嘅一個事實係：PSR FFP之類，係傾向「保護現有勢力」，維持現狀。所以你見啲豪門好多都幾贊成！舉例，你冇個痴線佬嚟燒錢，在德甲點挑戰拜仁？佢長期多錢過你一大截，商業收入同入場人數都多你一大截，年年有歐聯，你點玩？（所以德甲拜仁獨大，亦同50+1，冇得老細足球有關。就唔好又要50+1，又要屌拜仁獨大）
24. 亦同樣地答到上面我講嘅問題：維拉要洗錢衝歐聯你明，但點解曼聯唔洗？因為曼聯係「old rich」呀，冇一兩季歐聯死唔到人。但對維拉分別就天同地。（至於紐卡素，就已經「燒咗」，冇乜力再燒了）。你睇曼聯冇歐聯，利物浦冇歐聯，一樣好地地。「但阿積士冇歐聯會死人的」，所以咪大地震。而高普打歐協聯，一樣冇問題（亦因為咁，我估紐卡素危過車路士）
25. 而曼城就識玩啦！燒錢就趁早燒！你話愛華頓蝕錢嘅，扯，曼城早年咪又係蝕到仆街！但嗰時未有PSR嘛！到曼城自己well established，有fan base 有贊助有青訓 — 「咁我就梗係話要推PSR啦！」 — 我上咗位，就唔會畀你用同一個方法上啦！呢啲操作，好多領域都見到。「等於鬼佬國家要講碳排放一樣」，梗係我一人一部車就得，你一人一部車就地球玩完啦。你見推咩Compliance 推ESG嘅，當然係大公司。越多呢啲「監管」，當然對既得利益者最好。No competition please
26. 無論如何，一大班網友，而家就如夢初醒。但本大師一早同你講撚咗，梗係要睇錢。不過until愛華頓真係畀人扣10分前，好多人都真係仲覺得「要理架咩？」「蝕錢又點？」「曼城夠蝕錢」。
作者Facebook Page ：金融肉骨茶
https://www.facebook.com/meatbonetea
Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，月費100港紙有找． 畀年費仲有85折
