［論東亞男人的抑壓］爸爸心裡苦，但爸爸不說
［論東亞男人的抑壓］爸爸心裡苦，但爸爸不說
好好表演堅強角色～～輕輕走開是男子漢魅力～～即使委屈都決不會再解釋
TLDR：男人哭吧不是罪。實情，大家有冇care過老豆嘅感受？定老豆都係好似尊佛咁，一碌木咁，深不可測，完全唔知佢想點？佢唔講自己唔開心，但你唔覺得佢好開心。佢唔講自己擔心乜，但你明明知佢擔心好多嘢。鼓勵老豆講出自己感受吧。點鼓？由自己做起。做老豆嘅你，亦都勇敢講出自己感受吧。其實冇乜嘢嘅。信我，雖然我冇小朋友
1. 唔知點解，今年父親節比較有感覺。可能因為我近期比較感傷，亦可能因為家父早排入院（好似冇乜事，倒係我覺得好大件事，以為佢就死。大吉利是，但我一向作最壞打算，對自己都係。而我當然唔敢同佢親口講）
2. 吾友余家強兄提到「取消父親節」（https://fbook.cc/4Xl2），理據我都明白同意，特別係提到「唔通叫老婆叫仔女去攞位飲茶，最係又係搞著自己」。仲有，又怕仔女破費，又怕自己啲演技唔好，收到啲十九領呔公事包表現得唔夠開心。呼，男人好累呀！（＊）
3. 的確如此。事實上，好似冇乜聽過父親好享受父親節。余兄話齋，父親節本身都係女人帶頭搞的。吾友中午同自己老豆同三個女食飯，夜晚又去幫人補習搏殺。坐低食餐晚飯都不為不能，Benz for the mouth，傳統東方男人，男主外女主內。三個女，一個老婆全職湊女，兩個姐姐，皮費重也。
4. 點解父親不享受？因為，東亞男人活得好苦呀！都係人格面具，而東方父親呢個角色，係不容許你去「享受」。享受就是錯，細路仔同女人先享受。男子漢，修身齊家治國平天下（其實邊有咁多國畀你治？唔怪得個個男人都打機打三國打信長，當然包括我）。同樣地，講嘢就是錯，細路同女人先咁多嘢講，男人，唔好婆婆媽媽，唔好日朝到晚咁多勞蘇。
5. 所以父親一般都係西口西面目無表情。東方定型，嚴父慈母。太和善嘅父親，會被視為金魚佬，或者「烚熟」，「冇威嚴」。
6. 記憶中，我父親，甚至其他父親，都係唔享受啲甚麼「飲茶」，「夜晚食飯」，甚至仔女送嘅十九公事包領呔。而大家著實，都唔係好知老豆鍾意乜，甚至唔係好在乎。
7. 父親節順老豆意，最後老母黑面，仔女鬧交，呢啲故事我都聽唔少。變相老豆都自閹，仔女老婆話點就點啦 — 因為老豆只想有一刻清靜。
8. 我冇見過有老豆父親節同人鬧交，但我就有見老母母親節同人鬧交。因為男人好累，仆街，聽日唔使做咩。慳返啖氣啦。難食？是但啦。貴？是但啦。啲十九公事包領呔唔等使？是撚但啦。男人老狗，當眾發難，唔好睇呀。食入肚吧
9. 這就是東方男人
＝＝＝＝＝＝＝
10. 其實唔關我事，我冇打算生仔，冇利益衝突。不過還是不太同意余兄結論。父親節，還是保留較好
11. 因為，做東方男人真係好累，做老豆更累。本人不忍，連一年一個屬於佢地嘅日子都冇埋。具體地講，近日我睇到唔少其他父親嘅故事。固然係隱惡揚善，你總唔會父親節去訪問過搞親女嘅獸父。但還是不忍，如果冇埋父親節，呢啲男人嘅故事，可能就咁煙沒。
12. 真係要檢討嘅，應該將「將父親節交回父親」，不過easier said than done，唔好問我有乜高見。我識嘅，就拎諾貝爾和平獎了。
13. 敬天下嘅父親，雖然唔係每一位都十分可敬。甚至我老豆，亦唔係一個十分好嘅老豆（我不介意當面同佢講），我唔會刻意美化佢
14. 不過，人無完人，在我心中，佢都係合格嘅。雖然佢冇幫我好多，冇教我好多嘢 — 但「唔幫忙就是好幫忙」，佢好少迫我做任何嘢，亦冇阻住我做任何嘢。而咁已經好夠了。
15. 大個咗，我先知道呢啲並不是必然嘅。千里馬固然要伯樂，但更多根本係未出到市集已經畀人整死咗。後來見到身邊嘅朋友，學生，有啲真係硬生生畀啲仆街老豆老母拖累咗，害咗 — 而呢樣嘢並冇出現在我身上
16. 用一個生動但未必人人明嘅比喻去講，就係好似踢波咁，你明明過晒條友，爆咗一步出去，但佢都在後面夾生踢低你死腳。然後仲要鬧返你轉頭。扭得咁過癮丫拿 — 有啲老豆老母就係咁。但我老豆老母從來冇係咁（＊＊）
17. 我亦唔敢講「我做得好過佢」，所以我選擇逃避呢個角色，我唔去做老豆，就唔使比較。我細個開始就係咁，做得唔叻嘅嘢，就唔會去做，怕出醜。固然近年面皮就厚咗好多，「唔識金融都去寫」，但始終啤件細路出嚟，就係一個生命，就唔同我寫篇食評咁兒戲，所以唔會亂試
18. 你睇我連狗都唔養，就知我其實係個好負責任嘅人呀！（離開香港先養吧，唔得閒放狗，東方男人好累）
＝＝＝＝＝＝＝＝＝＝＝
19. 有關「東亞父親」嘅抑壓，好多人講過，但我還是經常講。
20. 特別係睇戲，一見到呢啲角色，份外投入。你見我睇《阿媽有咗第二個》，完全接受唔到入面depict嘅父子關係，既單薄又造作。羅永昌bad，尹揚明even worse（我講人設，唔係演技）。
21. 到睇《過時，過節》 — 拿，就比較對辦，特別係前半。梁祖堯同老母家姐嘅矛盾，喂我問你借錢你唔借都算啦做乜同老母講？毛姐同謝君豪嘅相處，失業父親嘅鬱悶。仲有之後炒大鑊，個仔叫佢坐低，謝君豪一句就「無目尊長！我係你老豆，唔好命令我做嘢！」。個仔再駁嘴，佢就一巴星埋去「屌！」 — 邊撚有咁多理論呢！使同你解釋？東方老豆，使同你講咁多道理？你邊位？（所以套戲去到尾就冇乜說服力了。雖然唔出聲嘅東方父親都好多，但冇咁溫文）。（可以睇吾友Hong Lam寫佢老豆，就係咁上下。我使同你講道理？（https://lkdin.io/49M4__0">））
22. 我唔知呢啲係禮教吃人，定係網友口中嘅「儒毒」。東方嘅男人，就更加辛苦。但即使鬼佬，亦都面對呢回事
23. 根源，就係傳統嘅masculinity，有時變成toxic．男人，就要似返個男人。Toxic Masculinity，無處不在，比你想像嘅多。棍波車，整電器，換水機，裝電腦，唔好食甜品，要畀貼士。爆房自己check in 先，出晒錢（＊＊＊），吹噓自己尺碼，持久力，「佢冇幫以前男朋友」，「佢平時唔出街」，「真水」（唔知係乜嘅有得佢），顏射吞精，全部都係masculinity。仲有無處不在嘅「嘩你係咪男人嚟架」「好心啦做男人做到你咁cheap」「風度」等等
24. 不過，我認為最toxic嘅，係「男兒有淚不輕彈」。推而廣之，廣之過真田廣之。男人嘅感受，係冇人理嘅。男人老狗，做乜由朝到晚怨婦咁？
25. 冇錯，做女人都好辛苦，一樣性別定型。傳統上女性地位不及男性，收入唔及男性，面對嘅不平等好多。姑且唔好講「其他地方搵返著數」嘅微妙平衡，但如果女讀者話，「喂，做女人都好辛苦你又唔講」 — 我係絶對同意嘅。做人就係好辛苦。
26. 問題係，女人好辛苦，有人聽，有人同情。姐妹同情，老公同情（雖然左耳入右耳出），老豆老母同情你，仔女都可能同情你。但誰在乎男人有幾辛苦呢？
27. 女人唔在乎，男人都唔在乎。事實你根本唔係好敢講出口！
28. 話說近一兩年，不同生理心理嘅問題都困擾住我，我都有搵唔同嘅朋友傾。但，朋友（男女仔都有）會留意到，我嘅一個特點係：我係唔介意分享自己嘅感受，唔介意「主動求助」。（亦都好多人話，根本我就是一件港女）
29. 我唔知呢個係優點定缺點（怕且係優點）。但你懂的，凡事收在心入面，唔開心都唔敢講，驚畀人睇唔起，嗰個唔係我。
30. 我都用咗一段時間，先唔再去羞於表達自己嘅感受。不過在東亞男人中，我係少數。絶大多數佬，都係唔會表達自己嘅感受。似乎唔係好事。
31. 點解佬要咁壓抑？說來話長，唔知有雞先定有蛋先。但個「文化」上係咁教育你。我輩男兒，自細受嘅教育都係咁。人地要求你咁，你亦咁要求別人，你亦要求自己。Social norm
32. 點改變呢種文化？好簡單。由自己做起！勇達去表達自己感受吧！唔好怕人笑，唔好怕樣衰。人無恥則無敵。
33. 正面啲講，固然都係雞同蛋。男人覺得，「點開口呀」，「我講出嚟其他人會點睇我？」 — 唔少人怕人笑，怕人judge，就索性自我封閉
34. 但根據我實測，冇你想像中咁大件事。無論男女朋友都好，都係唔會笑我嘅（背後我唔知，眼不見為乾淨）。所以個問題，都係你自己。
35. 所以，鼓勵你老豆講出自己嘅感受吧，你唔問又點知？你問佢都未必答，咁你由自己做起吧。老豆，勇敢咁講出自己感受吧（飲乜撚嘢茶啫，點解父親節唔可以靜靜地？）
＝＝＝＝＝＝＝＝＝
36. 不過呢，都係有口話人，冇口話自己。其實我好想同我老豆講，「雖然你唔係個十分稱職嘅老豆，但我從來都冇怪你」。Wow, so melo
37. 不過，「屌，男人老狗，咁撚肉麻點講出口呀！」 — 我中嘅毒，都唔係一時三刻排得晒嘅
38. 其實舊年我做完手術時，幾乎有次機會同佢獨處，原本係想講的了（唔通我兩個妹在場我咁同老豆講。「長兄嘅威嚴何在！」「唔顧自己威嚴都顧下老豆丫」「在兩個妹面前當面話自己老豆，似咩樣」）
39. 原本真係諗住同佢講，但就真係好似拍戲咁，然後，就因為啲好無聊嘅事，中途有人殺出，就冇獨處，就冇講到。
40. 然後我都係選擇在呢度講，睇下佢有冇機會睇到。
41. 因為，「屌，男人老狗，咁撚肉麻點講出口」
42. 果然都係easier said than done
43. 但，對住女仔，再撚肉麻我都講得出喎！所以，都係toxic masculinity。害人不淺。
（＊）留意，余兄話「我育有兩個屁孩」 — 這也是十分「東方」的講法。我唔打算批判，但的確東西大不同。
（＊＊）難得咁開心，又講埋我老母。雖然佢做成我不少嘅困擾，而家我都仲係會發惡夢夢見佢。但公平地講，佢都冇乜點樣阻止過我，拖累過我，害過我，欠過我。都係要分得細啲 — 當然我見親佢都覺得好累，好火星撞地球，就係後話（相信佢都係咁諗）
（＊＊＊）一日你仲係叫男同事換水（無論你係男定女），一日你仲係接受唔到女仔畀錢爆房（無論你係男定女），我地都係唔使討論「兩性平等」。
